Saliña- Dia 29 di Novèmber atardi den e ‘showroom’ di Autocity den Saliña a tuma lugá presentashon di e kandidatonan ku lo partisipá na elekshon di Reina i Prens ku Pancho 2014. Pa 2014 manera a keda anunsiá kaba, e elekshonnan di tantu Reina, Prens ku Pancho Grandi i Hubenil i tambe Rei i Reina Tiner ta na enkargo di e organisashon ‘Pro Art Productions’. ‘Pro Art Productions’ ta preparando un tremendo shou pa e elekshonnan menshoná. E proseso di preparashon di e kandidatonan tambe a  kuminsá kaba i ta kana na satisfakshon. Pa Reina grandi ta partisipá un total di 10 damita i pa Prens ku Pancho un total di 5 Duo. Pa Rei i Reina Tiner tin un total di 11 duo ku ta inkluí skol i tambe otro organisashonnan ku ta partisipá na Marcha di Tiner 2014. Pa elekshon Hubenil tin 5 Duo i tambe 10 partisipante pa Reina Hubenil. Den 2013, AGKK a introdusí e sistema di tene tur elekshon den un fin di siman. Komo ku e sistema akí a resultá eksitoso lo apliká esaki tambe den 2014. Ta kuminsá ku elekshon di Rei i Reina Tiner riba djabièrnè 31 di Yanüari pa 8’or di anochi. Djasabra 1 di Febrüari ta sigui ku elekshon di Reina i Prens ku Pancho Grandi pa 8or’ di anochi. Djadumingu ta finalisá ku elekshon di Reina Hubenil i Prens ku Pancho Hubenil  pa 3’or di atardi. Tur elekshon ta tuma lugá den WTC. E aña aki tin un parti nobo kaminda lo bai tin elekshon di Talento pa Reina i Prens ku Pancho Grandi dia 18 di Yanüari. Esaki ta tuma lugá 8’or di anochi den La Tentashon. Manera e karchinan ta kla lo anunsiá na unda por kumpra karchi di manera ku un i tur por asistí na e elekshonnan aki ku ta pinta di bira fantástiko. AGKK, Kas di Kultura i tambe Pro Art Productions ta yama DANKI na Autocity ku un biaha mas a pone un outo komo premio pa e ganadó di Reina di Karnaval 2014 i tambe un danki na Seguros Brouwer ku ta sigurá e outo un aña largu “All Risk”. ‘Ku Kòrsou na Mente, nos Karnaval ta Ekselente!.’