Willemstad – Fundashon Bikes 4 Kids Curaçao a regalá 100 baiskel nobo, huntu ku lòk i hèlmu, na muchanan di ménos rekurso durante di su Third Annual Bikes 4 Kids Bike Give Away djadumingu 21 di desèmber 2014 na Planet Willemstad. Tambe e muchanan a risibí instrukshon di seguridat i teps pa kore baiskel for di siklistanan lokal. E meta di Bikes 4 Kids ta pa tur aña regalá 100 baiskel nobo na muchanan di Kòrsou ku ta bini di famia ku no por kumpra baiskel pa nan yunan. Aña pasa Bikes 4 Kids a regalá 80 baiskel nobo. Bikes 4 Kids ta un fundashon non-profit i e fondo nan pa e baiskel nobonan tabata posibel pa medio di donashonnan hasi pa kompanianan i individualnan lokal. Nos kier a gradisí nos spònsernan ku ta Cost-U-Less, Refineria Isla, MCB, Trio Penotti, Insel Air, Curaçao Brewing Company i Dragon Fly Media i tambe tur e voluntarionan ku a yuda pa asina Bikes 4 Kids por a regalá e baiskel nobo nan. Un “Danki” speshal na Subway, Coca Cola Kòrsou i Kuster’s Trading ku a regalá kuminda i kos di bebe pa tur e muchanan. Fundashon Bikes 4 Kids a wòrdu establesí 8 di mei 2012. Mishonnan fundamental di Bikes 4 Kids ta:

• Regalá baiskel nobo nan muchanan di ménos rekurso
• Promové responsabilidat i independensia di nos hubentut
• Promové salu pa medio di ehersisio
• Promové seguridat pa medio di kore baiskel ku seguridat den mente
  Pa mas informashon por yama 528-4885 òf bishita nos página di web www.bikes4kidscuracao.org