WILLEMSTAD, FEBRÜARI 2014 – Preparashonnan ta den ‘full swing’ pa yüli próksimo Scouting Antiano tene e di 15 Jamboree di Karibe aki na Kòrsou ku 1000 hóben di e.o. Kòrsou, Aruba,
Boneiru, Sint Maarten, Jamaica, Trinidad & Todago, Barbados, Guadeloupe, i Merka. Kada kuater aña, Scoutnan di Karibe entre 12 i 18 aña di edat ta topa pa selebrá e hermandat scout i fortalesé lasonan di amistat ku ta krusa barera. Próksimamente nan lo topa aki na Kòrsou di 21 pa 28 di yüli na nos sentro di kampamentu na Ronde Klip. Mas ku un siglo pasá Baden Powell a kuminsá ku un movementu dirigí na formashon integral di hubentut. Su vishon tabata simpel: si kada hóben desaroyá su mes na e máksimo di su kapasidat, e por kontribuí sin duda na krea un mundu mihó. Imaginabo awor, 107 aña despues, un movementu di mas di 30 mion hóben trahando riba nan mes? Scouting Antiano, komo un miembro afiliá na e movementu aki tin e gran honor di duna kontenido na e vishon di Baden Powel organisando e di 15 Jamboree di Karibe. Ku e Jamboree aki, Scouting Antiano ta duna oportunidat na 1000 hóben pa eksperenshá un aventura inolvidabel, den kual lo brinda nan diferente aktividat pa inspirá i motivá nan, pa na regreso den nan pais nan bira mensaheronan di pas, tumando desishonnan pa hasi kambionan positivo den nan bida i den nan pais/komunidat. Eksplorando Tesoronan di Bida Bida ta un tesoro. E Ser Supremo a duna nos tur kos pa hasi bida un goso, pero ta keda na nos pa sigui desaroyá esaki. Ku e tema „Life:Tracking Treasures”, partisipante lo eksplorá e tesoronan rondó di nos manera nos multikulturalidat, nos amistatnan, nos mente, nos kurpa, nos naturalesa i nos dushi hendenan.
SCOUTING ANTIANO THE SCOUT ASSOCIATION OF CURAÇAO Programa di e Jamboree Durante e siman di Jamboree, e programa ta konsentrá riba e 4 elementonan básiko di bida: awa, tera, airu i kandela. Splash ta e módulo di aktivdat ku ta representá elemento awa. Aki e partisipantenan lo haña oportunidat pa eksperenshá aktividatnan akuátiko. E módulo: tera, ta brinda e hóbennan un eksperensha aventuroso den nos naturalesa, mientras e módulo: airu, lo hibanan den tempu, pasado i futuro, di nos bunita isla. Por último e modulo: kandela, ta invitá e scoutnan pa ekspresá nan mes pa medio di arte (p.e. baile, kanto i drama). Mirando ku Scouting ta trata na semper keda relevante pa e hóben, i pa ten’é na altura di desaroyonan mundial, e programa di Jamboree ta inkluí un „Global Development Village”. Den e aldea aki e scoutnan lo eksplorá desaroyonan global riba tereno di salubridat, derecho humano, desaroyo empresarial i teknología.
Un Jamboree ta un manifestashon di kultura, pues dia 25 di yüli nos lo tene un Festival di Kultura. Henter pueblo di Kòrsou ta bon biní pa selebrá ku nos aya na Ronde Klip. Tur pais partisipante lo eksponé nan kultura en grande, i naturalemente nos propio kultura lo ta sentral riba e dia aki. Scouting Antiano ta konta riba akogida di nos pueblo en general. Pa un siman largu Kòrsou lo ta sentro di Scouting den nos region. Ban huntu duna kontenido na esaki i mustra ku bèrdat Kòrsou ta grandi den tur sentido. Pa mas informashon: Ariadna Nicasia Relashonista Públiko Scouting Antiano 512-2132 arsco_cur@hotmail.com