WILLEMSTAD- 20 di desèmber 2017 – Resientemente, Kòrsou a risibí un grupo grandi di e empresa Amway Venezuela. E biahe a keda organisá dor di e agensia di biahe venezolano, Omega Travel i a konta ku partisipashon di 150 persona. Amway Venezuela a skohe Kòrsou komo destinashon pa premia su mihó bendedónan pa 2017.

Na yegada di e grupo, Ofisina di Turismo di Kòrsou (CTB) a ofresé un kòktel di bon biní, durante kual tabatin oportunidat di interkambiá ku esnan presente. E grupo di 150 persona a hospedá na Santa Barbara Beach & Golf Resort. For di luna di mart último Omega Travel a kuminsá ku preparashon pa e biahe aki kaminda nan a tene diferente reunion ku CTB i diferente hotèl pa despues a hasi nan eskoho. Tur aña Amway ta skohe un destinashon, aña pasá tabata Costa Rica i e aña aki nan a skohe pa Kòrsou. Komo parti di e biahe, CTB a pèrkurá pa un iterinario di aktividat pa e delegadonan ku a inkluí un bishita na Cas Abou, sentro komersial Sambil, algun museo i tambe un rekorido ku guia den Punda.

Un di e strategianan di merkadeo pa Kòrsou ta tambe pa merkadeá i promové nos isla den grupo òf segmentonan mas chikitu, ku e meta di haña un reakshon repetitivo. Kòrsou ta un destinashon ideal pa biahenan di insentivo manera esun di Amway, kaminda ta traha un pakete pa un grupo spesífiko inkluyendo un  iterinario di akuerdo ku nan deseonan i pèrkurá pa nan eksperensia ta inolvidabel.