WILLEMSTAD – Dia 6 di mart awor Kámara di Komèrsio ta organisá un konferensia den World Trade Center (WTC) ku un kantidat di 8 empresario internashonalmente konosí i 3 eksportadó lokal eksitoso.

Meta di e konferensia ta pa brinda empresarionan hèrmènt pa hasi negoshi, entre nan pa nan sigui internashonalisá empresanan lokal ku tin mira riba kresementu den eksterior òf ke bai e direkshon ei. E konferensia ta ofresé un plataforma pa empresario pa interkambiá informashon i pa tende di empresarionan ku ta operando internashonalmente ku éksito kon nan mester atendé nan aktividatnan riba e plano internashonal. Oradornan ta: Jeff Stay (Estádos Unídos), Adrian Reid (Barbados), Donald Demeritte (The Bahamas), Maarten Hendriks (Hulanda), John Sandiford (St. Maarten), Leopoldo Colombo (Argentina), Michael Seepersaud (Jamaica), Jan Willem van Bokhoven (Colombia), Renato Ignacio, Edward van Heyningen i Anne Zeeman (tur di Kòrsou). Empresarionan nobato i esnan ku eksperensia por registrá na www.BusinessPointConference.com. Preis di entrada ta NAf 50,= pa parti di dia òf pa e dia kompleto, miéntras ku ta ofresé tambe un almuerso.

Jeff Stay for di Merka ta fundador, direktor i CEO di Business Network International (BNI) Miami-Dade, e frankisia di ret komersial ku ta krese mas rápido na sur di Florida. Alabes BNI ta e organisashon di ret mas grandi na mundu ku mas di 160.000 miembro na 55 pais ku un volúmen di benta di mas ku 3 mil mion dòler Merikano. Ku su empresa nobo StaySuccessful e ta dediká na entrená i desaroyá servisio ku empresario, profeshonalnan, inkluso profeshonal den benta, tin mester di dje. Jeff Stay ta haña importante pa duna komunidat bèk i ta hopi aktivo den diferente hunta di komisario di organisashonnan ku no tin e meta pa hasi ganashi. E importansia di un manera adekuá pa forma ret di kontakto i kon bo por ta eksitoso den esaki ta e tópikonan ku Jeff lo trata durante e konferensia.

Adrian Reid di Barbados ta empresario i kofundadó di VisionFunder, e úniko plataforma di Crowdfunding den Karibe. Adrian tin mas ku 17 aña di eksperensia komo konsehero riba tereno di maneho, merkadeo stratégiko i desaroyo di negoshi. Ku su konsehonan Adrian su meta ta semper pa yuda e empresa ekspandé i pa desaroyá modelonan eksitoso di negoshi pa esei. E ta trahando na Estádos Unídos, Ghana (parti wèst di Afrika), Amérika Latina, i den área di Karibe. E ta kómodo riba e terenonan di Maneho di Rekurso Humano, Merkadeo, Planifikashon Stratégiko, Prestashon i Supervishon, i Maneho General di Negoshi. En bista di e demanda fuerte di numeroso kompania chikí i grandi pa realisá finansiamentu di nan kresementu e ku su tim ta dirigí mas en partikular riba Crowdfunding. Adrian lo rospondé en ekstenso na e pregunta kon pa lanta un proyekto di Crowdfunding di un forma eksitoso.

Donald Demeritte, Presidente di e Instituto Karibense di Konsehero Sertifiká di Maneho, ta di Bahamas. Donald ta un di e kuater entrenadónan master ku ta pèrkurá pa e programa Caribbean Export’s ProNet Training. Den e region aki el a tene un kantidat di tayer kaba riba tereno di Strategia di Negoshi i Merkadeo pa Eksportashon. Donald ta tambe miembro di direktiva di Banko Sentral di The Bahamas i presidente di The Bahamas Education Loan Authority. Su perisia ta entre otro den Strategia di Negoshi, Re-invento di Proseso, fungi komo Mentor i Eksportashon. E ta un entrenadó sertifiká pa Empresa Chikí i Mediano. En espesial Donald lo splika kon por prepará un kompania pa eksportashon. Den un di dos seshon e lo elaborá riba kon pa desaroyá un plan eksitoso di merkadeo pa eksportashon.

John Antonio Sandiford, doño di Antonio Media, resientemente a risibí e World Trade Center Eindhoven 2016 Young Professional Award. John ta Gerente di Proyekto, Diseñadó Interaktivo i Online Business Strategy i e ta alabes spesialmente vèrsá den Social Media. Su kompania ta partisipá den Founded By All, un klup di empresario kreativo den e ramo di diseño i ingenieria. Esaki ta basá riba un sistema di incubator ku e ta logra apliká ku gran éksito. Huntu ku Maarten Hendriks, John lo papia spesialmente riba kon pa lanta un business incubator ku éksito i kon pa apliká social media ku éksito.

Leopoldo Colombo ta bini di Argentina i e ta Managing Director di Quara Argentina S.A. ku mas ku 30 aña di eksperensia den Research and Development, Quality Management i Conformity Assessment and Innovation. Leopoldo a funshoná komo konsehero i entrenadó na mas ku 30 pais na Europa, Afrika, Norte, Sur i Sentral Amérika. Pa numeroso kompania na Canada, Estádos Unídos i Amérika Latina el a guia e proseso di sertifikashon. E instituto internashonalmente renombrá ASQ a sertifiká Leopoldo komo Quality Auditor i Quality Manager. Mirando su eksperensia amplio ku sertifikashon di ISO Leopoldo ta bai splika kiko ta e mihó manera pa un kompania manehá e proseso di inovashon. En bista di e kompetensia internashonal kresiente awendia inovashon no ta niun luho, pero un nesesidat pa sobreviví i sigui krese.

Michael Seepersaud a nase na Jamaica. E ta aktualmente team leader en key expert di e programa COSME ku e di dies Fondo Europeo pa Desaroyo ta finansiá. Ku su mas ku 30 aña di eksperensia komo konsehero riba Maneho i Desaroyo di Negoshi Michael a respaldá mas en espesial kompanianan chikí i mediano. E tin hopi eksperensia den e sektor agrario, prosesamentu di kuminda, negoshi di agrikultura (henter e área di produkshon: depósito, transporte, komèrsio i benta), industria leve, (produkto chikitu di konsumo) i e sektor di servisio. Michael lo elaborá riba posibilidatnan alternativo di finansiamentu pa empresa chikí i mediano i kon simpel ta pa apliká e business model canvas. Mas i mas ta di vital importansia pa diferensiá i pa disponé di un modelo empresarial efektivo.

Jan Willem van Bokhoven ta e direktor di Holland House Colombia i e tin 15 aña di eksperensia den e relashon komersial entre Hulanda i Amérika Latina. El a asistí mas di 750 organisashon Europeo den diferente sektor pa nan haña akseso pa e merkado Suramerikano. Awor Holland House Colombia ta brinda oportunidat di matchmaking na empresanan lokal i ta promové komèrsio i invershon. Kámara ta miembro di direktiva di Holland House Colombia. Diferente empresa lokal ya a hasi nan entrada riba e merkado Kolombiano. Jan Willem lo mustra tambe kiko Holland House por ofresé na servisio i oportunidatnan empresarial na Colombia.

Tres empresario ku ya ta ofresé su produkto i servisionan na Colombia i ku éksito, ta: Anne Zeeman, Edward van Heyningen i Renato Ignacio. Anne Zeeman ta e Business i Product Manager di Critical Communication Caribbean (C3), anteriormente Zenitel Caribbean. C3 ta suministrá entre otro produktonan manera Command Control Rooms, Intercom & Public Address, Digital Tetra Radio i Vehicle Tracking. Edward van Heyningen ta Managing Director di EOM Data Center, ku ta duna servisio den Karibe i Amérika Latina. EOM ta un partner di servisio sertifiká di APC, Data Center i Alpha pa outdoor UPS, DC Power i solushonnan di Inverter. Renato Ignacio ta Manager di Minubia i ta brinda solushon móbil pa empresanan manera: Cloud ERP, Real-Time Order Processing i un Workflow Management Tool. Tur tres empresario ku a hasi uso di e servisionan di Holland House, lo kompartí nan eksperensianan ku hasimentu di negoshi na Colombia.

Na www.BusinessPointConference.com empresarionan nobato i esnan ku eksperensia por registrá. Preis di entrada ta NAf 50,= pa parti di dia òf pa e dia kompleto, ku un almuerso leve inkluí.