Willemstad, – Dia 29 di mart lo tin un dia habri “Opendag” di La di La Tentashon Performing Arts Academy. Teatro Luna Blou i La Tentashon ke sigui kontribuí na desaroyo artístiko di nos pais Kòrsou. Ta pa e motibu ei nos lo kontinuá ku formashon Artístiko pa nos hóbennan. Entrante djasabra awor tur hóben ku ta deseá di haña formashon artístiko i ku tin plan pa sigui un karera artístiko por bira miembro di La Tentashon Performing Arts Academy. Bou di direkshon di Segni Bernardina i su grupo di profeshonalnan di teatro Luna Blou, hóbennan di Kòrsou ta bai haña e oportunidat di drenta un kursista i sali un artista. E loke ku ta hasi e akademia di arte aki interesante ta ku e hóben por sali skol bai teater mesora. Na teater Luna Blou e hóben por kome, traha hùiswèrk bou di guia i te asta haña tayernan ku ta yuda nan desaroyo general (algemene ontwikkeling). Despues di traha hùiswèrk i haña tayer riba desaroyo general e hóben ta bai traha riba su desaroyo artístiko. Tur dia e hóben ta haña training riba un disiplina di teater. La Tentashon Performing Arts Academy ta habri su inskripshon awor i bo tin te ku fin di aprel pa bo inskribí. Tene na kuenta si ku e kantidat di hóben ta limitá. La Tentashon Performing Arts Academy ta pa hóben entre 12 pa 18 aña di edat. E ta spesialmente pa hóben nan ku ta bishita skol sekundario. E idea ta pa e hóben orientá i tuma un desishon pa bai sigui studia arte riba nivel di MBO òf HBO. La Tentashon Performing Arts Academy tin konekshon ku vários akademia di teater na Hulanda, Merka i den Region. Djasabra dia 29 di mart ta bo oportunidat pa eksperensia un parti di loke ku bo ta bai haña den e aña eskolar 2014-2015. For di tres or di atardi lo bai tin tayer di Baile, Kanto, Músika Aktuashon i hopi mas. Aparte di esei lo bai duna informashon di e akademia i lo por inskribí mes ora. La Tentashon Performing Arts Academy Drenta un kursista i sali un artista. 
Pa mas informashon por yama Teatro Luna Blou 4622209. Bo por bishita nos riba facebook: La Tentashon òf Teatro Luna Blou. E página wep nan ta den Konstrukshon.