fondonan rekoudá ku benta di arte ta bai pa RMHC
Willemstad – Resientemente Curaçao Lions Club a tene un ekuentro ameno ku e artistanan ku ta partisipá na e di dos edishon di ART X. ART X ta un festival di arte kaminda bishitantenan por apresiá diferente tipo di arte ku oportunidat pa kumpra esaki pa medio di subasta. ArtX ta tuma lugá dia 17 di mart pa 7or di anochi na Landhuis Klein Kwartier. Pa e anochi aki Curaçao Lions Club ta kombertí su kas, den un berdadero galería di arte. E aktividat prinsipal di Art X ta e subasta di arte (art auction) kaminda tin mas di 25 artista lokal ta partisipá ku diferente tipo di arte, komo por ehèmpel kuadro, eskultura i arte di potrèt. E inovashon den e dos edishon di Art X ta ku e biaha aki a inkorporá eksperensianan artístiko (art experiences) den e subasta. Eksperensianan artístiko manera entre otro workshop di pinta kuadro pa un grupo, les di tango pa un grupo i asta riba un pintura riba muraya (mural painting) pa sea kas òf ofisina. Meskos ku e promé edishon ku a tuma luga na aña 2016 a invitá 3 yu di Kòrsou prominente pa partispá den e sekshon titulá “Pinta pa un bon kousa” (Paint for a Cause). Ta trata aki di:
- Eugene Rhuggenaath Promé Minister di Kòrsou
- Anuschka Cova Presidente di CIFA
- Luigi Virginia Partner di HBN Law
Enbista ku Ronald McDonald House Charities Curaçao (RMHC) ta bai tin hopi mas gastu pa e Family Room na hospital nobo, Curaçao Lions Club a skohe pa hasi e donashon for di e fondonan ku rekoudá di Art X e aña aki atrobe na nan. Banda ku RMHC ta enkargá ku e Family Room den St. Elisabeth Hospital tambe nan ta ofresé ayudo na famianan ku mester bai afo ku nan yu pa tratamentu di kanser. Hopi biaha e sen no ta alkansa pa tur dos mayor por akompaña nan yu.
Ta bai tin piesanan di arte di diferente artista renombrá manera entre otro Ariadne Faries, Joanne den Dulk, Phillipe i Giovanni Zanolino, Papy Adriana, Carlos Blaaker i Michèle Russel Capriles. Pa un lista kompletu di tur e artistanan partisipante den e subasta, bishita nos website: www.artxcuracao.com Karchinan pa ART X ya ta na benta na Antraco Schottegatweg, Albert Heijn Zeelandia i por hasi pedido tambe riba e facebook page www.facebook.com/artxcuracao. Karchi ta kosta solamente NAf.150,- pa persona ku e intenshon pa partisipa na e subasta i kumpra arte. Sigui tur informashon di ART X via facebook i keda pendiente ta ken ta bai ta e artistanan lokal ku ta bai akompaña e 3 invitadonan di “Pinta pa un bon kousa”