WILLEMSTAD – Den luna di mart 2017 pueblo di Kòrsou a sera konosí ku un programashon nobo, moderno, i dinámiko, aki ta referí na 2dPOINT TV show.

2dPOINT ta un programa nobo presentá pa Naesha Zunder, Melissa Corea, Silvetty de la Paz huntu ku Vanja Wanga. Aki ta trata di 4 dama profeshonal riba diferente area di profeshon, entre otro merkadeo, enseñansa, i finansa. E programa ta ilustrá un anochi kaminda kuater amiga ta topa otro na nan klup preferí pa asina pasa un ratu ameno ku otro mientras ku nan ta kòmbersá riba diferente tópiko.

E temanan ku ta kòmbersá di dje ta hopi varia. Den tur edishon ta sòru di trese tópikonan ku un persona komun i koriente por relatá su mes na dje. Lo kubrí tópikonan ku tin di haber ku relashon, trabou, avanse teknológiko, i hopi mas. Loke ta interesante ta e hecho ku e oudiensia ta disfrutá di 4 diferente punto di bista mientras ku e mes ta forma su propio opinion.

E programa di televishon 2dPOINT ta pasa riba djamars 9:30 di anochi na nos planta Nashonal TeleCuraçao. Aparte di e kantidat di kombersashon interesante ku tin durante e programa, pueblo por disfrutá tambe di varios entrevista eksklusivo, weganan, i raportahenan di algun evento i aktividat turístiko ku e presentadónan a bishitá. Di e forma aki un i tur por keda na altura di kiko tur nos por hasi riba e dushi pida baranka aki ku yama Kòrsou.

Pues sintonisá TeleCuraçao djamars 9:30 di anochi pa asina bo tambe por disfruta di 2dPOINT. No lubida di kompartí bo punto di bista ku e tim di 2dPOINT.

Si bo tin un tópiko ku bo ta deseá pa trata den programa manda esaki riba Facebook di 2dPOINT.