Willemstad – Den kuadro di Siman Bestial i ku patrosinio di tantu TeleCuraçao komo CBA Television lo pasa 4 programa informativo tokante Parke Tropikal. Ku esaki TeleCuraçao i CBA a uni ku Parke Tropikal i kontribuí na ampliá konosementu di nos komunidat riba desaroyonan rondo di Parke Tropikal. E programanan bestial aki tin un durashon di mei ora i ta pasa kada bes promé ku e notisiero estelar di anochi na tur dos kanal. E programa ta presentá pa Solange Trinidad i a keda produsí pa Mariela Romero. Trabou di filmashon, editing i montahe ta den man di boluntarionan i amigunan di Parke Tropikal, Leo Elizabeth i Burnid Cachemir. Na TeleCuracao e programanan bestial aki ta kumisá mitar di 8 di anochi na kanal 8, riba djaluna 22, djarason 24, djaluna 29 di sèptèmber i e último programa djarason dia 1 di òktober. Na CBA Television e programa ta kuminsa mitar di 7 di anochi riba djamars 23, djaweps 25, djamars 30 di sèptèmber i e último programa djaweps 2 di òktober. Den e promé programa lo pone énfasis riba kon Parke Tropikal a kumisá i su historia. Programa 2 ta trata e Masterplan di 2013 – 2023. E arkitekto Harm Rooijakkers di Studio Acht i señor Wendell Bonifacio di Curacaosche Wegenbouw Maatschappij lo splika nan partisipashon den e proyekto aki. Programa 3 ta pone lus riba kuido di bestia i algun di e trahadonan ku diaramente ku hopi amor ta kuida e bestianan. Kon pa bira Amigu di Parke Tropikal i e importansia ku trabou boluntario tin pa e parke, ta keda tratá den e último programa. Durante di tur e programanan lo pone atenshon na e aktividatnan rondó di Siman Bestial ku ta Zoohunt i Fun & Family Day at the Zoo. Pues sintonisá TeleCuraçao, mitar di 8 anochi djaluna 22, djarason 24, djaluna 29 di september i djarason dia 1 di oktober i CBA Television mitar di 7 di anochi djamars 23, djaweps 25, djamars 30 di september i djaweps 2 di oktober. Fundashon Parke Tropikal ta yama TeleCuraçao i CBA Television masha danki pa e gesto bunita aki.