Apresio pa e promoshon impagabel ku e’la duna na Kòrsou komo destinashon den Karibe:

WILLEMSTAD- 24 di novèmber 2013- Ofisina di Turismo di Kòrsou (CTB) ta gradisí pueblo di Kòrsou pa e sosten brindá na Wladimir ‘Coco’ Balentien, hérue nashonal i ‘homerun king’ hapones. Tabata na inisio di henter e ‘Coco Fever’ ku Minister di Desaroyo Ekonómiko, Sr. Palm a bishitá Hapon pa duna Wladimir ‘Coco’ Balentien un homenahe di parti di su pais natal na e pais ku a koron’é komo rei hónronero. Durante e bishita na Hapon 2 persona i un prensa hapones a gana e oportunidat pa bishitá Kòrsou i eksperensiá e wèlkòm ku Kòrsou a duna Wladimir ‘Coco’ Balentien dia 17 di novèmber último. CTB ta felisitá e komishon ku a traha pa realisá e wèlkòm pa Coco Balentien, tabata tin un kantidat 12 miembro di prensa hapones i internashonal a aserká CTB pa yuda nan kubri e ‘welcome parade’. E medionan di komunikashon ku a bishita nos di Hapon i Venezuela tabata: NHK; the public TV broadcaster of Japan, Lara plus Marayanes (Venezuela), TBS TV Japan, Fields Corporation i media freelance di Hapon. E resultadonan tabata sumamente positivo;  por a tuma nota kon bunita Kòrsou a bria den medionan di komunikashon te aya na Hapon. CTB tabata anfitrion di e miembronan di prensa hapones i tambe di e 2 ganadornan durante nan estadia na Kòrsou; nan a siña konosé nos isla i a interkambiá ku nos hendenan lokal. Tabata notabel kon apresiá i stimá Wladimir ‘Coco’ Balentien ta na Hapon huntu ku nos otro peloteronan Andruw Jones i Hensley ’Bam Bam’ Meulens. Por hasi menshon tambe ku CTB a pone su skouder bou di e siman eksitoso dediká na beisbòl durante e evento Curaçao Baseball Week 2013. CTB  ta masha kontentu ku partisipashon di tur nos peloteronan den beisbòl internashonal ku a forma parti di e klínikanan ku a wòrdu duná. Djabièrnè último Wladimir ‘Coco’ Balentien a hasi un bishita na CTB, na su turno CTB a dun’é un wèlkòm spesial den un ambiente di Coco. Empleadonan a mustra nan apresio pa e promoshon impagabel ku Coco Balentien a duna na Kòrsou komo destinashon den Karibe. Hapon no ta un merkado prinsipal na unda ta merkadeá Kòrsou komo destinashon, pero despues di e ‘Coco Fever’ ta sigur ku a krea hopi interes pa nos isla komo destinashon tropikal. Danki Coco, nos ta orguyoso di bo!