Hinter komunidat ta invitá pa partisipá riba 9 i 10 di mart

WILLEMSTAD— CURA DOET a yuda durante e último 5 añanan sentenáres di organisashon na Kòrsou. Nos ta orguyoso di e míles di boluntarionan ku a duna un man. Pero tambe ainda tin hopi kos pa hasi. E di sinku edishon di CURA DOET, e akshon boluntario nashonal di Kòrsou, ta pinta di bira algu grandi atrobe. Un total di 263 diferente organisashon sosial, inkluyendo organisashonan di bario, di skout, di deporte, di grandinan i hopi skol rònt Kòrsou a inskribí en total 307 tarea òf aktividat riba www.curadoet.com i awor ta buskando 5,500 boluntario pa djòin nan durante CURA DOET dia 9 i 10 di mart 2018.

Den 2014 a organisá CURA DOET pa promé biaha i 2600 hende a partisipá pa kumpli ku 132 tarea i aktividat. Den 5 aña e kantidat di proyekto i boluntario a bira dòbel mas tantu. Aworaki faltando 1 luna mas pa e di 5 edishon, nos ta hasi un yamada pa boluntarionan inskribí masalmente pa adoptá un proyekto k’un grupo. Boluntarionan por mira tur e tareanan i aktividatnan riba www.curadoet.com  i por inskribí komo individual òf grupo. SGR Group/Fundashon Verriet entre otro ta buska boluntario pa yuda traha un ‘Greenhous” i tambe nan mester di yudansa ku renovashon di nan “berging”. 54 skol, entre otro Kolegio Sur Herman Joseph, Amadornita College i A.E. Goilo School i hopi mas lo pinta i dekora nan klasnan, nan terenonan di hunga i murayanan ya nos muchanan ta siña ku mas plaser i entusiasmo den un ambiente kolorido i alegre.

Durante CURA DOET, organisashonan i boluntarionan ta uni forsa, p’esei e lema di CURA DOET ta ‘Dun’un man, gan’un kurason’. E dos dianan ta un okashon úniko kaminda diferente hende di tur edat por bin huntu — koleganan, amigunan, kompañeronan di deporte i famianan— pa nifiká algu pa otro i pa komunidat. Huntu nos ta logra mas ku ora nos ta nos so. Huntu e diferensia ku nos por hasi ta hopi mas grandi. Ban sigui hasi e diferensia i inskribí bo mes awor komo boluntario riba www.curadoet.com