Esaki a sosodé awe mainta na Botika Otrobanda durante un konferensiá di prensa ku e Vice Presidente Ehekutivo di Mediq Phamacies Hulanda y Internashonal, Drs. Gerben Klein Nulent hunto ku Sr. Han Deelstra, Country Manager di Visser Trading Kòrsou, a tene na Botika Otrobanda. Mediq lo trese kalidat haltu pa e pueblo di Kòrsou, asina country manager Han Deelstra a elaborá durante su presentashon. Pa por mehorá e servisio na e klientenan, e empleadonan a risibí kurso for di e ekspertonan di Mediq. E enfoke prinsipal lo ta e servisio ku e empleadonan lo brinda na e kliente. Deelstra a sigui bisa ku Mediq su meta primordial ta un mihό supervishon di e medikamentonan ku ta entregá e pashènt. Si en kaso un pashènt haña un resetá di dòkter ku no por meskla ku otro, e empleado di Botikanan Mediq por duna un mihό konseho, tur esaki danki na e kursonan ku nan a sigui. drs. Gerben Klein Nulent Vice Presidente Ehekutivo di Farmacianan Mediq Hulanda y Internashonal a elaborá riba kiko Mediq ta nifiká. Sigun Nulent, Mediq ta un sentro ku ta ofresé produktonan farmaseutiko di kuido y servisio ku ta dirigí pa yuda bo kuida bo salú. E pashènt ta sentral den tur loke Mediq ta representá. E konsepto di Mediq ta manera un tienda di salú. Su diseño y kolónan ta reflehá un ambiente ku ta inspirá kuido y konfiansa. Algu nobo y importante tambe ta e espasio privá ku tin den kada Mediq pa atendé ku kada pashènt si e tin pregunta of mester konseho riba un tratamentu spesial. Introdusiendo Mediq no solamente na Kòrsou pero tambe na Aruba y Sint Maarten ta nifiká ku awor Mediq no ta un botika so e ta ofresé kaminda e kliente ta buska su remedinan, pero tambe kaminda e ta haña su konsulta ku eksperto ku lo brind’é e servisio y konseho ku e mester.