Pa e bon trabao cu Aruba Tourism Authority ta desplega hunto cu otro partnernan
ORANJESTAD, Aruba – November 2015: Aruba Tourism Authority (A.T.A.) ta hopi orguyoso pa mira nan trabao y e esfuersonan di nan partnernan reconoci pa instancianan prominente den mundo di biahe, turismo y recreo. A reconoce of nomina e oficina di turismo di Aruba y algun di su partnernan internacional pa diferente premio internacional den e ultimo simannan y kier comparti e bon noticia cu comunidad di Aruba.
Aruba Tourism Authority ta orguyoso di tur su empleadonan, tanto esunnan estableci na Aruba of den e otro mercadonan unda ta traha na interes di turismo di nos isla. Separa di su mesun empleadonan, ta gradici tur e agencianan y otro partnernan den turismo di Aruba. Y sin por lubida e partner principal, e pueblo general, cu tur dia ta duna Aruba e miho di nan mes y cu tin un compromiso cu desaroyo y proteccion di nos industria turistico. E oficina di turismo di Aruba ta consciente di e esfuersonan, trabao duro y empeño di tur envolvi, pa haci di Aruba e miho destinacion den Caribe, cu ta percura pa logra nominacion pa diferente premionan internacionalmente reconoci.
Dos nominacion pa Travvy Award
A nomina Aruba pa dos ‘Travvy Award’, den e categorianan ‘Best Overall Tourism Board’ y den e categoria ‘Best Overall Luxury Destination’. Den e prome categoria Sur Africa y Suisa tambe ta nomina; y den e di dos premio ta compara Aruba cu Malta y Mexico. TravAllianceMedia ta presenta Travvy Awards y ta honra companianan di biahe, productonan di biahe, ehecutivonan di biahe, agencianan di biahe, agentenan di biahe y destinacionnan pa excelencia den loke nan ta haci. Ta anuncia e ganadonan di Travvy Awards dia 6 di januari 2016.
Ganado di HSMAI ADRIAN AWARD
Aruba a presenta un instrumento nobo den su ‘’mix”’ di mercadeo, esta ‘The Happiness Builder’, cu ta brinda bishitantenan y futuro bishitantenan acceso na dje pa medio di nos website www.aruba.com. For di entre mas di 1300 nominado, a scoge ‘The Happiness Builder’ como ganado di e prestigioso ‘HSMAI ADRIAN Award’. Den esaki Aruba Tourism Authority a gana e ‘silver award’. Pa e programa ‘One Happy Selfie’, Aruba a gana e ‘gold’ award.
E miembronan di un hurado consistiendo di expertonan, a evalua cada proyecto a base di nan mesun merito y exito den cumpli cu nan metanan y a dicidi cu ‘The Happiness Builder’ ta innovativo y creativo y, mescos cu ta e caso cu e ‘One Happy Selfie’, ta cumpli cu su obhetivonan.
Partner di Aruba ta gana ‘Media Agency of the Year’
U.S.I.M ta un partner di Aruba riba tereno di promocion y mercadeo y ta cu hopi orguyo Aruba Tourism Authority a ricibi e grato noticia cu e organisacion aki a gana e titulo di ‘Media Agency of the Year, Programmatic’ di e institucion Mediapost. Russell Zingale di U.S.I.M a expresa cu e premio ta algo grandi pa nan, particularmente pasobra nan ta un agencia independiente cu tabata entre otro nominadonan cu ta companianan enorme. U.S.I.M y Aruba ta uzando ‘Programmatic TV buy’ como parti di nos strategia di medio. E sistema ta un forma innovativo y eficiente pa yega e cliente desea pa Aruba.