ACADEMY HOTEL I FEFFIK HUNTU PA TURISMO


Aña 2015 ta sigui trese mas aliansa stratégiko ku ta benefisiá e sektor turístiko i formashon di hóben den desaroyo komo profeshonal. Dia 8 di sèptèmber 2015 Stichting Academy Hotel Curaçao (AHC) i Fundashon pa Edukashon, Formashon, Fishi i Kapasitashon (FEFFIK) a firma un Memorandum of Understanding (MOU). Presidente di Academy Hotel Sr. Paul Kok i direktor di FEFFIK Sr. Ludwig Alberto ta kombení ku e organisashonnan lo traha huntu riba desaroyo i formashon práktiko di studiantenan di diferente fishi pa medio di kuponan di stazje den ambiente turístiko.

Aporte na Turismo

Na nòmber di direktiva i gerensia di Academy Hotel Curaçao, Sr. Kok ta yama un ‘Bon biní’ na e hóbennan di FEFFIK ku lo pasa nan periodo di stazje den e departamentu di mantenshon di e hotel kaminda nan tambe lo kontribuí na turismo pa Kòrsou. Invitadonan i representantenan di ku a presensiá e firmamentu di e MOU a selebrá e logro akí.

Na AHC studiantenan di tur nivel di enseñansa for di AGO te ku Universidat por kore stazje den hospitalidat bou di guia di un staf profeshonal. Komo parti di e periodo di práktika, e studiantenan ta responsabel pa dirigí, manehá i mantené e 40 kambernan i e restorant di e hotel. Un tim di mantenshon ta importante pa por yuda garantisá kalidat di servisio di e hotel ku ta operashonal non-stop. P’esei AHC ta kontentu di por konta ku e studiantenan di FEFFIK.

Academy Hotel ta habrí tur dia i ta disponibel pa organisá i koordiná evento, fasilitá sala di reunion i ta ofresé servisio di ‘catering’ pa kualke otro aktividat. E tim kompleto ta gradesí tur kliente lokal i internashonal pa e sosten i interes ku ta kresiendo i gustosamente ta kla pa risibí mas huéspet lokal i internashonal. Pa mas informashon di e proyekto, organisashon di evento òf reservashon di estadia por pasa libremente na Academy Hotel den Punda. Tambe por bishitá www.academyhotelcuracao.com òf sigui AHC via facebook pa e menú di siman i diferente otro speshal.