Turismo ta profilá komo un di e pilarnan mas balioso pa ekonomia di Kòrsou. Aliansanan stratégiko, relashonnan benefisioso i varios logro importante ta karakterisá e promé parti di 2015 den sector turístiko. Esaki ta konta tambe pa Academy Hotel Curaçao (AHC) komo organisashon spesialisá den desaroyo di e capital humano nesesario pa sirbi e merkado laboral aktual i di futuro.
AHC ta fasilitá oportunidat na studiante di tur nivel di enseñansa for di AGO te ku Universidat pa kore stazje den hospitalidat bou di guia di un staf profeshonal. Komo parti di e periodo di práktika, estudiantenan ta responsabel pa dirigí i manehá e 40 kambernan i e restorant di e hotel. Mirando ku e hotel ta operashonal non-stop, fluho kontinuo di stazjère ta esensial pa garantisá kontinuidat di e hotel. Prinsipalmente den temporada ku skolnan lokal ta será i tin menos stazjère lokal, Academy Hotel ta kontentu di por ofresé guia na stazjèrenan for di eksterior tambe pa kompletá e tim.
‘Memorandum of Understanding’
Pa garantisá lasonan mas fuerte i duradero ku diferente instituto edukashonal, direktiva di Academy Hotel Curaçao ta orguyoso di por formalisá akuerdo ku entre otro Inter-Continental University of the Caribbean, konosí komo ‘ICUC’. Presidente di Stichting Academy Hotel Curaçao, Sr. Paul Kok i koordinadó di programa di Inter-Continental University of the Caribbean, Sr. Sidney ‘Bicho’ Justiana a firma un Memorandum of Understanding (MOU) dia 28 di mei 2015 entre e dos organisashonnan akí den presensia di diferente invitado. Sr. Kok ta anunsiá alabes ku pronto por spera mas formalisashon ku e sektor edukashonal i ku lo sigui traha pa prepará mas hóben pa e sektor di Turismo.
Refuerso for di Sürnam i Ulanda
Otro primisia ta yegada di e promé grupo di stazjère for di Sürnam. Un total di 7 studiante di Turismo di e skol IMEAO Suriname ta reforsá e tim te ku fin di yüli. For di Ulanda tambe tin dos stazjère di MBO Toerisme en Recreatie di ROC Noorderpoort, Groningen ku lo keda un máksimo di kuater luna. E temporada di stazje di e studiantenan internashonal ta kai nèt den e dos lunanan ku stazje i aña eskolar ta kaba pa mayoria studiante lokal. Huntu ku e tim di studiante lokal e hóbennan lo sera konosí ku kada departamentu di Academy Hotel Curaçao komo parti di un ‘cross training’. E interkambio entre e studiantenan lokal i esnan di Sürnam i Ulanda ta tremendo oportunidat pa e hóbennan siña di otro.
Academy Hotel ta habrí tur dia i ta disponibel pa organisá i koordiná evento, fasilitá sala di reunion i ta ofresé servisio di ‘catering’ pa kualke otro aktividat. E tim kompletu ta gradesí tur kliente lokal i internashonal pa e sosten i interes ku ta kresiendo i gustosamente ta kla pa risibí mas huéspet lokal i internashonal. Pa mas informashon di e proyekto, organisashon di evento òf reservashon di estadia por pasa libremente na Academy Hotel den Punda. Tambe por bishitá www.academyhotelcuracao.com òf sigui AHC via facebook pa e menú di siman i diferente otro speshal.