Willemstad, Curaçao – Djabièrnè último riba e fecha di nan aniversario, ACU a hasi e lansamentu di un servisio nobo ku ta karga e nòmber E- Loan. E servisio aki ta hasi posibel ku sosionan di ACU por apliká pa nan fiansa unda ku nan ta i ki ora ku ta. Sosionan ku ta deseá di apliká pa un fiansa via di e sistema aki, mester subi e wèpsait di ACU,www.acu.cw, klek riba e link di E-Loan i esaki lo dirigí nan direktamente na e página pa asina nan por hasi e petishon di fiansa ‘online’. Tambe nan mester agregá tur e dokumentonan nesesario pa por apliká pa un fiansa den forma digital (scan). E servisio aki ta aktivo for di kuminsamentu di novèmber pero ACU a lans’é ofisialmente riba e fecha di su 53 aniversario.

Pues, di e forma aki e kooperativa di spar i krédito ta invitá tur su sosionan pa hasi uzo di e servisio aki pa asina e bira unu eksitoso.

Ku esaki ACU ta demonstrá un biaha mas ku e kooperativa di spar i krédito ta sigui inová.