JetBlue ta agrega vuelonan diario for di Fort Lauderdale pa Aruba Mas di 25,400 stoel adicional for di Merca
ORANJESTAD, Aruba: Aruba Airport Authority N.V. (AAA) cu orguyo ta anuncia expansion di capacidad di stoelnan disponibel for di e mercado di Merca, cu 25.422 stoel den e proximo lunanan. Esaki ta inclui vuelonan adicional di Jet Blue for di Fort Lauderdale, Florida.
“Nos ta trahando duro pa logra alcansa nos meta di crecemento e aña aki y cu e enfoke pa hasta surpas’e,” asina Jo-Anne Arends, Air Service Development Manager na Aruba Airport Authority N.V. a bisa orguyosamente durante e conferencia di prensa teni den e VIP Room completamente renoba na Aeropuerto. E high season di turismo pa e periodo 2016-2017 ta yama bonbini na mas vuelo di JetBlue, American Airlines, Delta y United Airlines for di varios ciudad Mericano, aumentando e “seat capacity” pa nos isla. Ademas di e vuelo diario for di Fort Lauderdale, cuminsando na januari 2017, JetBlue ta agrega un di tres vuelo for di Boston riba diasabra, entre november 2016 y april 2017; y un di tres vuelo for di JFK (New York) riba diasabra for di dia 4 di januari te cu dia 15 di februari, 2017.
E vuelo entre Aruba y Fort Lauderdale ta sali for di Fort Lauderdale pa 11:22 di mainta y ta baha na Aruba pa 3:24 di atardi; y e ta sali bek for di Aruba pa 4:20 di atardi, yegando Fort Lauderdale pa 6:25 di atardi.
Actualmente JetBlue, cu a cuminsa vuelonan pa Aruba riba dia 15 di september 2006, ta ofrece nuebe vuelo semanal for di Boston, 12 vuelo semanal for di JFK y e servicio conoci como “Mint Premium Service” riba diasabra for di JFK y Boston. Vice Presidente Network Planning pa JetBlue, esta Dave Clark, a laga sa cu e compania ta entusiasma pa anuncia mas expansion di nan vuelonan for di Fort Lauderdale. Cu beachnan pintoresco, un variedad di opcion pa cu actividadnan di recreo…y hotelnan fantastico, Aruba ta sigui ta un di e destinacionnan cu clientenan di JetBlue ta sigui pidi, Clark a declara na Caribbean Journal.
American Airlines tambe a anuncia cu nan lo cuminsa atrobe cu nan di tres vuelo tur dia entre Aruba y Miami desde dia 15 di december y United Airlines a haci ahustacionnan significante na su red, añadiendo 12% di capacidad for di Newark, incluyendo servicio adicional semanal y avionnan mas grandi pa acomoda pasaheronan riba dianan cu ta rekeri mas capacidad.
Cuminsando den luna di september Delta ta agrega un total di 120 stoel pa siman y entre oktober y december nan lo provee 140 stoel extra pa siman riba e ruta di Atlanta, pa un crecemento di 25%, yegando un total di 7,286 stoel adicional for di Atlanta. E aerolinea tambe ta reemplasa avionnan riba e ruta pa acomoda mas pasahero (+12%) entre dia 17 di december 2016 y 25 di maart 2017. Aruba Airport Authority N.V. ta gradici tur partner cu dia den y dia afo ta traha man den man pa logra e tipo di storianan di exito asina, den cual ta aumenta capacidad di stoel pa nos isla Aruba. “Aruba Hotel and Tourism Association y Aruba Tourism Authority ta hunga un rol clave y esencial den e esfuersonan y logronan di Aruba Airport Authority N.V.. Nos ta contento y satisfecho di por conta cu e dedicacion di tur esunnan envolvi den logra exito y mas ampliacion di servicio areo pa Aruba, beneficiando e pilar di nos economia,” Jo-Anne Arends a conclui bisando.