Asosashon di Gruponan di Karnaval Kòrsou (AGKK) a tene un rueda di prensa djamars 23 sèptèmber 2014. Meta di e rueda di prensa tabata pa duna un informashon tokante Karnaval 2015 i reakshoná riba loke minister I. Dick a indiká den e rueda di prensa di  dia 17 sèptèmber último. Riba e fecha menshoná minister Dick a presentá Fundashon Multi Event Organisation (M.E.O) komo e organisadó di Karnaval 2015. Pa loke ta trata Karnaval 2015 AGKK a indiká ku e direktiva ta bai bèk na e tareanan ku nan tabata ehersé semper pa e gruponan por ehèmpel:

• Kordiná e ‘keuring’ di e vehíkulonan di e gruponan ku ta partisipá den Karnaval 2015;
• Perkurá pa tur obligashon ku gruponan tin ta konosí serka nan, entre otro shofùrnan, i tambe e parti di nan derechinan kual nan ta Derecho di Outor i Prekario.

Pa loke ta trata e parti di Derechi di Outor AGKK lo tuma kontakto den luna di òktober ku tur media ku lo por ta interesá pa transmití. Ainda e Prekario 2014 no a ser risibí, i ta un parti ku gruponan ta usa pa prepará pa e siguiente temporada di karnaval. AGKK a indiká tambe ku a pidi un “aanvullende subsidie” den luna di mart 2014 mirando ku e aña aki e fondonan risibí for di komersio no tabata sufisiente. For di luna di desèmber 2013 AGKK a pidi un sita pa por a papia tokante di e posishon finansiero ku fondonan ku tabata drenta, pero no a haña un sita. Finalmente den luna di aprel a risibí parti di e “aanvullende subsidie” ku e kombenio ku lo a bin despues ku e sobra. AGKK ta wardando riba esaki pa por kaba di kumpli ku e obligashonnan pendiente. Den kuadro di e di 45 edishon, era moderno, di Karnaval di Kòrsou, AGKK lo bai duna homenahe na personanan i gruponan ku a duna sosten na e fiesta kultural di Kòrsou. Detayenan di esaki lo ser anunsiá despues. Tambe AGKK a indiká ku djabièrnè awor 8’or di mainta lo reuní ku M.E.O. na Sektor di Kultura i Deporte pa por indiká tur e puntonan ku organisadó di Karnaval ta responsabel pe ora ta trata e gruponan di karnaval. Por ehèmpel e destinashon di e fondonan ku tantu AMAK komo Lions Club ta duna pa ku Marcha Hubenil. Por último AGKK a duna un reakshon riba e loke minister Dick a bisa den e rueda di prensa di djarason dia 17 sèptèmber último. AGKK a indiká ku su posishon tabata pa keda organisá karnaval pero no komo e “vergunninghouder” mirando e hecho ku ta e presidente lo ta “hoofdelijk aansprakelijk” hasiendo un tarea di Gobièrnu pa nos komunidat. A indiká 3 opshon na minister Dick i Sektor di Kultura i Deporte for di mart 2014 den un karta. E opshonnan aki tambe a ser presentá na sèptèmber 2013 ora a pidi pa tuma un desishon mas lihé posibel pa loke ta trata Karnaval 2014. Tur e opshonnan tabata un tim forma pa Kas di Kultura i AGKK, i un di e opshonnan tabata esun di Kas di Kultura komo “vergunninghouder” i AGKK sostenedó. Den e reunionnan di evaluashon  di Karnaval 2014, den lunanan aprel i mei 2014, a indiká na Sektor di Kultura i Deporte ku AGKK i Kas di Kultura ta di akuerdo pa Kas di Kultura bira e “vergunninghouder” na lugá di AGKK. Hasta AGKK a indiká esaki den diferente programa ku el a presentá den dje. Den e lunanan ku a sigui te ku 12 ougùstùs 2014 a puntra na diferente okashon kon ta para ku e desishon, i AGKK tabata haña di tende ku no tin un desishon ainda pero ku e opshon ku a duna ta ser konsiderá. Den un reunion ku minister Dick 19 ougùstùs 2014 a bolbe indiká e opshonnan aki. Despues di esaki a pidi AGKK pa buta den un karta ku AGKK no ke organisá Karnaval 2015, pero nos a bolbe indiká den nos karta ku ta e opshon ya menshoná ta nos deseo. Den reunion di djaweps 11 sèptèmber último AGKK a bolbe indiká esaki na minister Dick, i a buta esaki den un karta ku a ser entregá den ménos ku 5 dia, djaluna dia 15 sèptèmber último, den e di dos reunion  ku minister Dick. Minister di su parti a indiká den e reunion di dia 11 sèptèmber ku e a duna outorisashon na M.E.O. pa kuminsá hasi nan preparashonnan kaba i ku minister ta deseá pa nos bai yuda nan. AGKK a indiká ku nos lo tin ku bai bèk den nos seno i ku nos lo duna un kontesta pa mas tardá djamars 16 sèptèmber. Desishon di gruponan a kai djaluna 15 di sèptèmber anochi i AGKK a komuniká esaki na minister Dick den un karta ku a ser entregá djamars mainta dia 16 sèptèmber. E loke AGKK ta lamentá masha ta e manera ku e proseso aki a kana, mirando ku for di mart 2014 AGKK a indiká su deseonan, huntu ku Kas di Kultura, i te ku 12 ougùstùs a indiká ku no tin un desishon ainda. Pa ta bon kla ku AGKK semper a aktua di buena fe i transparente. AGKK a duna prensa e posibilidat pa lesa tur e korespondensianan ku a tuma lugá. Ku esaki AGKK a indiká ku e ta kla ku e asuntu aki i ta spera ku e sobrá di e “aanvullende subsidie” i e Prekario 2014 ser transferí pronto.