Despues di diferente insinuashon den un sierto medio di prensa eskrito i riba e página sosial di Facebook, agrupashon musikal GENTZ ta di opinion ku e mester aklará sierto puntonan inkorekto ku ta sirkulando pa asina nos hendenan no kai den gara di bróyonan fantasma.

GENTZ den su forma di presentá a trese na vários okashon dilanti kaba ku e agrupashon musikal a lanta ku e vishon pa engrandesé nos farandula lokal. GENTZ a wòrdu funda dor músikonan ku ya tin algun aña kaba ta forma parti di e mundu farandulero i ku kier a bin ku un estilo nobo. Pues e agrupashon musikal GENTZ no a lanta pa kibra i pa papia malu di niun banda. Pero lamentabelmente tin personanan di mala fe ta inventá susesonan i krea odio bou di e pueblo i fanatikada sin tin mester.

Na promé lugá;

Tur músiko/kantante/ integrante di e agrupashon GENTZ a hasi un eskohé personal pa bin forma parti di e agrupashon paso nan tabata ke un kambio. Esaki ta konta den nos bida personal diariamente ku si un persona ke un kambio por ehèmpel di empleo e ta hasi un eskoho pa adelanto òf progreso. Pues organisashon di GENTZ “NO” a kita niun persona for di niun otro agrupashon siendo ta nan mes eskoho pa bin forma parti di GENTZ. Den bida tur persona tin derechi i e libertat di hasi nan eskoho sea e ta bon òf malu.

Na di dos lugá;

Agrupashon musikal GENTZ a partisipá na Festival di Tumba di Kòrsou e aña aki pa promé biaha i a klasifiká ku tur su sinku tumberonan. Esaki ya kaba tabata un satisfakshon enorme pa GENTZ. Ademas pa agrupashon musikal GENTZ esaki tabata e momento pa demostrá pueblo di Kòrsou kiko e agrupashon ta kapas pa hasi i kiko nos komo GENTZ ta pará pe pa trese un inovashon den nos farándula. Esaki tabata pa nos, nos logro!

Pues loke hurado a husga i saka komo e ganadó di tumba ta meresidamente. I pa loke ta trata e finalistanan Nos di GENTZ ta respetá esaki i “NO” a ventilá niun kritiká den direkshon di hurado òf e organisashon di Tumba kual ta AMAK. Paso Festival di Tumba ta keda un kompetensia. Pues por fabor stòp di krea broyo i lanta falsu testimonio un biaha mas.

Na di tres lugá;

GENTZ tin su mes trailer di Karnaval patrosiná pa su Spònser for komienso ku e agrupashon a lanta kla pará ta warda. Pues e notisia ku a wòrdu publiká resientemente tokante kumpramentu di e trailer di un otro agrupashon musikal ta simplemente un redu falsu pa sigui krea enemistat i pone fanatikonan kontra di nos agrupashon.

GENTZ kier aklará ku kisas tin sierto persona(nan) ta purba pinta GENTZ di un manera negativo i ta keda instigá un guera entre GENTZ i otro agrupashonnan musikal, i esaki simplemente “NO” ta e kaso i nos “NO” kier ta partísipe den e akto nan aki tampoko. GENTZ ta un banda ku hóbennan profeshonal i ehemplar ku kada un tin nan trabou na pechu i kada un tin nan trayektoria i eksperensia musikal tras di lomba. Pues GENTZ no tin niun interes pa partisipá den niun guera musikal ku lo pone GENTZ den un lus negativo, engaño òf bróyonan krea pa persona òf tersera personanan

E tipo di manipulashon aki GENTZ ta lamentá ku tin den e mundu farandulero i ta spera ku esaki lo no ripití mas. Finalmente ta un farándula nos tin ku nos tur komo músiko tin ku biba for di dje, pues pakiko kibra otro, instigá òf krea bróyonan fantasma.

GENTZ tei pa entretené nos pueblo ku bon músika manera tur otro agrupashon musikal, pues laga nos TUR ta un bon ehèmpel, paso atraves di músika nos por transmití alegria i positivismo na nos pueblo engeneral.