A invita 50 studiante pa participa na ATECH Conference 2016
ORANJESTAD, Aruba – 21 di september 2016: Aruba Hotel & Tourism Association (AHATA) a haci un donacion significante na un total di 50 studiante, ofreciendo nan e oportunidad di participa na ATECH Conference 2016, cual a tuma luga den fin di siman. Nos hobennan ta para diariamente dilanti di decisionnan importante pa cu nan futuro estudio y carera den un mundo cu ta cambia, transforma y innova continuamente.
E rol di tecnologia den tur e desaroyonan tumando luga ta clave y den turismo dia pa dia ta mira e influencia di tecnologia mas y mas como un instrumento importante y esencial pa tur tipo di funcion y funcionamento.
Cu e sponsorship di participacion pa 50 studiante, AHATA kier a fomenta e interes den tecnologia y desaroyonan tecnologico pa e futuro profesionalnan cu tin cu tuma e riendanan di e pilar di Aruba su economia, esta turismo y liderazgo den diferente otro areanan na pais Aruba.
E programa a inclui topiconan manera strategianan pa “startup” di companianan; influencianan digital y mercadeo di destinacion; componente nan clave pa un plan di negoshi efectivo; y mercadeo pa medio di email, tabata bon diversifica y balansa. Otro topiconan discuti a inclui strategia di medionan; entrepreneurship sin frontera y e era digital di conexion humano.
Ta cu hopi placer AHATA a haci e contribucion aki na desaroyo personal di e hobennan y ta spera cu nan disfruta di e conferencia y lo saca beneficio maximo di e informacion cu nan a ricibi.
Na september 1965 a funda Aruba Hotel Association y na 1987 a bira Aruba Hotel and Tourism Association (AHATA), cu awendia ta conta cu 90 compania miembro. Su miembresia ta varia for di hotelnan grandi, timeshare, operadornan di tours y companianan grandi y chikito den e sector. E rol primordial di AHATA ta pa proteha, dirigi y influencia e industria turistico di Aruba dor di sigura cu sector publico ta aloca fondonan di “Room Tax” den forma apropia, ta inverti e suma aki efectivamente y ta ehecuta plannan di mercadeo den forma corecto pa aumenta “rev-par” y e suma cu cada turista ta gasta ora ta di bishita riba nos isla.