Riba dia mundial di turismo…… Enfocando riba e berdadero caranan di nos turismo
ORANJESTAD, Aruba – 27 di september 2016: Turismo ta mas cu Gobierno so, e ta mas cu AHATA so, e ta mas cu e hotelnan, e restaurantnan, e operadornan di tours, mas cu aeropuerto, waf of cualkier otro organisacion. Turismo ta nos tur y ta cu e esfuerso colectivo aki den mente, e asociacion di hotel y turismo di nos pais, AHATA, ta enfoca riba tur cu ta traha den e industria relaciona cu celebracion di “Dia mundial di Turismo”.
Na Aruba ta probecha pa den e celebracion di e aña aki, cende tur luz riba e caranan cu diariamente ta percura pa ofrece e miho servicio posibel na nos huespednan, esunnan cu ta sigui bin tur aña, esunnan cu ta stima nos isla manera nan di dos cas. Na e grupo aki ta dedica e dia, cu e tema cu “Ami ta turismo” demostrando asina e sosten cu e organisacion ta spera di tur cu di un of otro manera, sea directamente of indirectamente, ta traha den e industria turistico.
Turismo accesibel pa tur hende ta tocante e creacion di formulanan pa complace e demanda di tur, sea ta biaha of ta keda cas mes. Sea ta pa un desabilidad permanente of temporario, famia cu yiunan chikito of famia di edad avansa, na un punto den nos bida, laat of trempan, nos lo beneficia di accesibilidad universal den turismo.
Ta cu e realidad aki den mente, United Nations World Tourism Organization ta haci un apelacion riba e derecho di tur ciudadano pa experencia e diversidad increibel di nos planeta y e bunitesa di e mundo cu nos ta biba aden. Riba Dia Mundial di Turismo e aña aki, ta importante pa conscientisa riba e importancia y tur e cantidad inmenso di beneficionan cu accesibilidad universal ta trece cune y por trece pa sociedadnan.
Desde su creacion, tur aña ta celebra dia mundial di turismo dia 27 di september, den un esfuerso pa conscientisa e comunidad internacional di e importancia di turismo y specialmente di su balor social, cultural, politico y economico. Como e fecha ta oficial den e kalender di Nacionnan Uni, e celebracion ta enfoca riba e potencial di turismo den contribui pa alcansa metanan sostenibel di desaroyo, atendiendo algun di e retonan dificil cu sociedadnan ta enfrenta awendia.
Na september 1965 a funda Aruba Hotel Association y na 1987 a bira Aruba Hotel and Tourism Association (AHATA), cu awendia ta conta cu 90 compania miembro. Su miembresia ta varia for di hotelnan grandi, timeshare, operadornan di tours y companianan grandi y chikito den e sector. E rol primordial di AHATA ta pa proteha, dirigi y influencia e industria turistico di Aruba dor di sigura cu sector publico ta aloca fondonan di “Room Tax” den forma apropia, ta inverti e suma aki efectivamente y ta ehecuta plannan di mercadeo den forma corecto pa aumenta “rev-par” y e suma cu cada turista ta gasta ora ta di bishita riba nos isla.