E di 14 Exposicion di Obra y Arte Recicla ta habri dia 23 di mei

ORANJESTAD, 22 di Mei 2016 – ARUBA: Comunidad di Aruba ta invita pa bishita e di 14 Exposicion di Obra y Arte Recicla organisa pa Aruba Hotel and Tourism Association (AHATA), cual ta tuma luga for di dialuna 23 di mei pa diabierna 27 di mei, 2016 na Biblioteca Nacional. Publico ta invita pa bishita e exposicion riba e dianan menciona for di 10or di mainta pa 12or di merdia y for di 2or pa 5’or di atardi. Riba diabierna dia 20 di mei e exposicion a habri oficialmente den presencia di e participantenan y invitadonan special. E exposicion ta consisti di tur e obranan y piesanan di arte cu ta participando den e di 14 competencia annual cual ta cay bao di auspicio di AHATA su comision di medio ambiente. Registracion pa e competencia a cera ya for di dia 30 di april, y e ganadonan lo wordo anuncia den oranan di atardi durante di un encuentro ameno den e sala di exposicion. Ganadonan ta keda scogi den diferente categoria, esta kleuterschool, scol basico 1,2,3, 4, 5, 6, scol secundario, individual amateur, individual profesional y grupo. E gruponan participante ta consisti di sea amigonan of famia of negoshi/hotelnan.

E participantenan a demostra un creatividad y inventividad enorme den nan creacionnan, cual ta consisti di materialnan cu a wordo uza caba un biaha, of mas, y nan a tuma y comberti den nan obranan bunita. Foam, plastic, bleki, papel, glas, aluminium y carton uza a conoce un bida nobo den mannan di e participantenan, kende tabata permiti di, ademas, uza lijm y verf pa logra e producto final desea. E hurado ta consisti di tres miembro y den e proceso pa scoge e ganadonan ta hopi importante criterianan manera e porcentage di e materialnan recicla uza y e tecnica cu e participante a uza. Tambe nan ta concidera e posibel uzo practico of decorativo di e proyecto presenta; y e creatividad, y acabado. Cada klas, individual y grupo participante lo ricibi un certificado pa na participacion y pa e ganadonan AHATA tin un coleccion di bunita regalo atractivo cu nan a ricibi di diferente sponsor.

E Comision di Medio Ambiente di AHATA ta invita comunidad di Aruba pa bishita e exposicion, cual ta habri for di 8’or di mainta pa 12 di merdia y di 2or pa 5’or di atardi. E entrada ta gratis. Pasa admira e creatividad di nos comunidad, y keda inspira pa e proyectonan presenta pa Reduci, Re-uza, y Recicla. Pa e di 14 edicion di e competencia aki, AHATA ta conta cu un grupo hopi valioso di sponsor, incluyendo e patrocinador principal, esta Tara Eco. AHATA ta gradici Biblioteca Nacional pa nan gran cooperacion pa cu e expo.