Scol Primario Kudawecha Klas 6C ta yuda turismo resolve dilema

Oranjestad, 29 di November 2016 – Aruba: Un topico of tema cu pa un adulto ta un “dilema”, pa un mucha ta generalmente algo cu e ta mira cu fascinacion, cu un otro bista, for di un otro angulo, simpel, sincero, y habri. E solucionnan cu e mucha ta bin cun’e tambe, hustamente pa e falta di experiencianan similar y prehuicio ta hopi biaha solucionnan viabel, alcansabel, inovativo y facil pa implementa, pero tambe efectivo.

For di e pensamento aki a nace e concepto di “Kids Council” na Hulanda, y mirando e resultadonan interesante di e colaboracion entre empresanan grandi y muchanan di scol, a dicidi di implementa e programa aki na Aruba tambe.

Na su introduccion Aruba Hotel and Tourism Association (AHATA) tabata un di e prome organisacionnan cu a acepta pa bira un di e partnernan di e Kids Council, y e resultadonan di nan prome proyecto hunto cu scol Pius X tabata un situacion win-win pa tanto e organisacion como e hobennan. AHATA no a duda ningun momento pues pa sigui p’adilanti cu nan sosten pa e kids council program, y actualmente un biaha mas ta trahando cu un grupo di estudiante hunto cu e comision di medio ambiente di AHATA riba un “dilema” nobo.

Rene Kannegieter, kende ta docente di klas 6C di Scol Primario Kudawecha, tabatin un experiencia previo cu e programa aki, relaciona na e colaboracion cu Kids Council tempo cu tabata traha na Pieterboerschool. E maestro a splica cu e dilema e biaha aki ta trata di e conscientisacion pa cu e ley nobo di prohibicion di saconan di plastic no-reusabel.

AHATA a acerca e hobennan cu e peticion pa yuda aumenta consciencia pa e ley aki, y motiva e comunidad pa ricibi e ley aki y participa na un forma activo na su implementacion.

Adultonan hopi biaha no ta wak e solucionnan di mas facil, pero e muchanan si, Kannegieter a agrega, contento cu su klas ta parti di e proyecto aki.

Pa introduci e dilema, Hyatt Regency Aruba Resort, Spa & Casino y su team a colabora cu AHATA su comision di medio ambiente, invitando e hobennan pa un recorido di e hotel y diferente presentacion cu ta indica e importancia di e “single use plastic bag ban” cu ta bay na vigor dia 1 di januari, 2017.

Raquel Bautista, Colleague Experience Manager di Hyatt tambe ta miembro di e comision di medio ambiente di AHATA, y tabata e anfitrion di e hobennan riba dia 25 di november. Hunto cu AHATA, Hyatt a percura pa e hobennan haya un recepcion cu algo di bebe y snacks, y un recorido di e hotel, unda cu nan por a mira pa nan mes tur loke e hotel ta haciendo pa cu cuido di medio ambiente.

Bautista ta splica cu e hotel a cuminsa ya for di augustus caba cu eliminacion di saconan di plastic cu ta wordo uza un biaha so; y en realidad ta solamente e saconan pa barinan di sushi ta “single use” ainda na e hotel.

Ademas, ta motivando e empleadonan tambe pa adopta e custumber ya caba pa haci uzo di nan mesun saco reusabel ora nan bay supermercado. Hyatt a regala tur empleado saconan durabel pa nan uza na cas.

Bautista a bisa cu Hyatt tin como proposito pa yuda medio ambiente, pa ta un pionero den e area aki y tin hopi iniciativa andando na e hotel cu ta sostene e ambicion y determinacion aki.

Tabata importante pa mustra e hobennan di Scol Primario Kudawecha kico exactamente Hyatt ta haci riba e tereno di proteccion y preservacion di medio ambiente, pues kico un compania local ta haci pa yuda comunidad y medio ambiente di Aruba.

Durante di nan bishita na Hyatt na a ricibi un presentacion tocante di saconan di plastic di un uzo, y kico nan influencia ta riba medio ambiente. Parlamentario, Donny Rasmijn a duna e presentacion como e presidente di e comision di medio ambiente di Parlamento.

Rasmijn a mustra e muchanan pa medio di un presentacion audiovisual con e saconan di plastic, cu tur e kimiconan cu ta wordo uza pa produci nan, ta yega te den e tayo di cuminda, y pues tambe den e stoma di e ser humano.

El a splica cu e saco ta kibra den pidanan chikito, minisculo den lama, y piscanan ta come e plastic pensando cu e ta cuminda (plankton). E plastic ta bay den su stoma. E ser humano ta gara e pisca, cushin’e y com’e. Asina e plastic cu tin den stoma di e pisca ta bay den stoma di e ser humano.

Rasmijn a comenta cu e muchanan tabatin hopi pregunta, e contacto cu nan tabata tremendamente bon, y e ta kere cu nan ta bon prepara pa carga Aruba den e proteccion di medio ambiente.

E Kids Council ta awo bon prepara y cla pa cuminsa cu e proceso pa analisa e situacionnan rond di e introduccion di e ley. Nan a haya tur informacion, y ta analisando e pregunta, su posibel solucionnan y diferente opcionnan cu nan lo presenta na AHATA ora cu nan cla cu nan raport.

Despues di e sesion di informacion, AHATA a organisa un Mannequin Challenge dibertido unda cu a saca hopi potret cu lo keda como recuerdo pa e muchanan di e “kick off” di nan proyecto importante y impactante.

E comision di medio ambiente di AHATA ta contento y orguyoso di e tin e hobennan di Scol Primario Kudawecha como nan partnernan di Kids Council pa e proyecto importante aki.