Willemstad – Awe merdia Curaçao Airport Partners inesperadamente a risibí notifikashon di Minister di VVRP ku e evento ‘Airport Runway Run’ ta kanselá. CAP no a risibí un motibu pa e kanselashon. Eventonan di “Run the Runway” ta wòrdu realisá rònt mundu, komo un manera ùniko pa establesé un relashon entre komunidat i aeropuerto. Komo un di e gran invershonistanan privá CAP ta haña sumamente importante pa kontinuamente mehorá e relashon importante ku mester eksistí entre aeropuerto i komunidat. Eventonan “Run the Runway” ta pasa bou di bon kontrol, i ta diseñá pa ta realisá durante operashon na aeropuerto. Tur e puntonan aki a ser konsiderá i tratá dor di CAP. CAP ke asegurá komunidat ku a risibí aprobashon di outoridat di aviashon sivil, i ku a tuma tur paso i medida di prekoushon nesesario pa metigá tur posibel rísiko, pues ta ekspresá su desapunto den e desishon di e Minister pa kanselá e evento. CAP ta apresiá e interes di komunidat pa partisipá den e evento ùniko aki, i ta lamentá ku mester informá komunidat i partisipante ku e evento pùbliko ta kanselá. Tur persona ku a kumpra un karchi por trese esaki bèk kaminda a kumpr’é i lo risibí nan sèn bèk. Esaki, for di djabièrne 1 di December. CAP ta pidi despensa na tur esnan ku a kumpra nan karchi i na turista ku a ekstendé nan estadia òf a bin Kòrsou speshal pa e evento aki. CAP realmente ta lamenta e inkombinensha ke e partisipantenan lo eksperensia. CAP ta gradisí tur boluntario, sponsor i partnernan pa nan esfuero.