WILLEMSTAD – Pa duna mas tantu hende e oportunidat pa respaldá e plannan pa un apertura rápido di Botika Barber, djadumingu 28 di yüni awor Bettina NV ta tene un enkuentro ameno entre 10 di mainta i 2 or di mèrdia pa henter e famia. Miéntras ku e adultonan ta firma e petishon na fabor di un pèrmit pa apertura di Botika Barber, e muchanan ta bula pasa prèt riba e kusinchinan grandi i ta perkurá ku tin refresko i pòpkòrn, miéntras ku un DJ lo perkurá pa músika.

E sitio pa e evento aki ta tuma lugá pegá ku e ofisina médiko di e dòkter di kas Marcel Sommer na Barber. Pendiente e pèrmit ku mester di e firma di minister Bernard Whiteman di GMN, Bettina NV ya a laga pone dos kònteiner luhoso ku por lo pronto por sirbi komo botika. No ta habitante di Bándabou so, tur otro hende tambe pone bin basha nan firma bou di e petishon durante nan keirumentu na Bándabou.