Bo ta bai di biahe? Atenshon 2 dia promé ku bo biaha

WILLEMSTAD- YÜNI 2014; Banco di Caribe ta invitá tur kliente ku ta pendiente pa bai di biahe pronto pa aktivá nan SuperCard. Pa protehé e kliente kontra ‘skimming’ i otro aktividatnan indeseá, Banco di Caribe a blòkia tur SuperCard pa uso internashonal i pa uso na otro islanan den region (islanan BES, St. Maarten i Aruba). Gerensia di Banco di Caribe ta haña importante pa keda konsientisá klientenan tokante di ‘skimming’, spesialmente awó ku ta drentando temporada ku mayoria kliente ta bai di vakashon.

Tarheta nobo di Banco di Caribe tin chip:

Banco di Caribe ta kambiando tur su tarhetanan di débito pa unu nobo. Esun nobo lo kontené un chip. Klientenan eksistente ta risibí nan tarheta nobo na kas, miéntras ku klientenan nobo ta haña esaki ora nan habri e kuenta na Banco di Caribe. Na momentu ku e kliente eksistente risibí su tarheta nobo na kas, e ta risibí athuntu tur informashon di e chip. Konseho di BdC na klientenan: Banco di Caribe ta konsehá tur su klientenan pa primeramente kambia nan PIN (Personal Identification Number), ademas di esaki ta importante pa ora e kliente ta marka su PIN, e tapa esaki ku man pa evitá otro hende mira e kódigo sekreto. Ta sugerí tur kliente pa warda e PIN aparte di e tarheta. Ora di pago, si mester entregá e tarheta keda ten’é na bista. Skimming: atkerí informashon (data di tarheta di pago), manera identifikashon i kódigo sekreto (PIN) di e usuario pa por uza e fondonan disponibel. Antisosialnan ta kopia e strep magnétiko di e tarheta di pago na momento ku e doño di e tarheta ta uzando esaki, pa di e forma ei kopia e informashonnan relevante pa asina yega na i hasi uso di e fondonan disponibel. Seguidamente nan ta traha un tarheta di pago nobo pa lanta plaka òf hasi pago via di sistemanan di pago usual, sea lokal òf internashonal.

Servisio di alerta via telefon selular:

Banco di Caribe ta urgi su klientenan pa registrá pa e servisio di ‘SMS-alert’ di Banco di Caribe. E sistema aki ta notifiká e kliente manera e hasi un transakshon via di mashin di pago i nan momento ku lanta sèn di ATM. Por pasa na tur ofisina di Banco di Caribe na Kòrsou i Boneiru pa registrá pa e servisio aki. E kliente mester trese su sédula òf otro identifikashon bálido i e number di telefon selular ku e ke pa risibí e notifikashon. E servisio ta disponibel 2 dia despues di registrashon. Na momento ku e kliente ta sospechá ku un transakshon a tuma lugá ku no ta e a hasi, e mester tuma kontakto ku banko na number di telefon (+5999) 432 3323 pa blòkia e tarheta. Banco di Caribe ta pidi su klientenan pa avisá mas tardá 2 dia promé ku realisá e biahe ya por aktivá e SuperCard pa uso internashonal i interinsular, por hasi esaki na tur filial. Banco di Caribe ta ofresé alternativa pa hasi pago manera su BDC Online, e Multicard i su tarhetanan di krédito. Masha importante: Na momento ku regresá di eksterior, laga Banco di Caribe blòkia e tarheta atrobe, pa bo propio protekshon.