WILLEMSTAD – Un kantidat di 20 mama hóben di e barionan Barber i Montaña a kuminsá ku kursonan di formashon, esaki den kuadro di  e Programa di Urgensia. E kursonan pa mama hóben di e barionan di Buena Vista i Otrobanda lo sigui dentro di poko.

Den e kursonan aki e hóbennan ta risibí lès di desaroyo personal i konfiansa propio, i  tambe kon pa traha pan i pasapalu krioyo. Aparte di esakinan, e hóbennan ta siña tambe kon pa traha un presupuesto i manehá nan entradanan. E kursonan aki ta bai dura en total 8 siman, kaminda e hóbennan lo reuní dos bia pa siman. Na final di e kursonan aki e hóben por sea kuminsá traha den un negoshi eksistente o traha riba su mes i sali pa dilanti.

Programa di Urgensia ta un programa di akshon dirigí riba mehorashon di e situashon di biba i traha pa pueblo di Kòrsou. E programa aki aktualmente ta keda implementá den kuater bario di Kòrsou, esta Montaña, Buena Vista, Otrobanda i Barber. E intenshon ta pa usa e eksperiensia atkerí den e barionan aki pa krea un modelo ku lo por keda implementá den demas barionan di Kòrsou. E meta prinsipal ta pa mehorá kalidat di bida di habitantenan den diferente bario di Kòrsou.