WILLEMSTAD- Minister di Desaroyo Ekonómiko, sr. Steven Martina a firma un akuerdo di kolaborashon ku direktor di Curoil N.V. , sr. Lasten den kuadro di koperashonnan integral ku lo mester tuma lugá entre e dos órganonan pa por frena desaroyonan indeseá den komunidat.

Regularmente tantu e departamento di inspekshon di Ministerio di Desaroyo Ekonómiko (MEO) komo e departamento di distribushon di Curgas N.V. ta enkontrá situashonnan den nan trabou diario ku no ta kuadra ku reglanan vigente. Ámbos partido ta konvensí ku dor di yega na un kolaborashon mutuo por logra un kombatimentu muchu mas efikas di práktikanan ilegal o ilísito ku ta tuma lugá riba nan área di trabou.

Na e okashon aki direktor di Curgas N.V. huntu ku minister Martina a firma pues un akuerdo den kua ta duna kontenido na e kolaborashonnan mutuo entre e dos órganonan aki. Pa medio di esaki ámbos partido a bai di akuerdo pa sistemátikamente trese na atenshon di otro kualke situashon ilegal o ílisito ku keda enkontrá.
Tantu MEO komo Curgas N.V. a komprometé su mes pa hasi loke ta nesesario i loke ta den nan fakultat pa duna kontenido na e akuerdo aki i lo no ta e intenshon pa traspasá otro su outoridat na ningun momento.
Ku firmamentu di e kolaborashon aki entre otro MEO i Curgas N.V. ta spera di por realisá un aktuashon gubernamental dirigí riba kombatimentu efisiente i efikas di práktikanan ilegal o ilísito di parti di tantu empresa- komo individuonan riba nos pais. Pero tambe e kolaborashon ta dirigí na mantenshon i mehorashon di e seguridat di tantu doño di establesimentunan lokal komo abitantenan di pais Kòrsou.
E akuerdo aki a keda aprobá pa konseho di minister dia 17 di yanüari último i en prinsipio lo e tin durashon di 3 aña lokual lo por keda prolongá por eskrito riba petishon di e partidonan.