Santa Barbara Resort ta risibí ‘Konseho di Mucha’

WILLEMSTAD – Djarason último 50 alumno di Sint Paulus College di Kuartí a tende for di esnan trahando na Santa Barbara Beach & Golf Resort kiko e ta nifiká pa traha den e ramo aki di e industria turístiko. E hotèl a duna un introdukshon ekstenso di tur e aktividatnan ku ta tuma lugá pa por duna e Konseho di Mucha kaminda di kana pa nan investigashon na ki influensia turismo tin riba nan ambiente di bida. Na okashon di su di 10 aniversario TUI Curaçao huntu ku e sektor di turismo a introdusí e Konseho di Mucha pa Kòrsou. E Konseho di Mucha ta un inisiativa di e fundashon The Missing Chapter (MCF) i UNICEF Hulanda. E konsepto a bini for di Hulanda. Prinsesa Laurentien ta fundadó i direktor di MCF. E Konseho di Mucha ta trese esnan ku ta tuma desishon den kontakto ku mucha pa perkurá ku organisashonnan ta integrá e interesnan di generashonnan di futuro den e prosesonan di tuma desishon di awe. Ku esaki na mente e Konseho di Mucha ta konopá un grupo di mucha (grupo 8 di un skol básiko) na gerensia di un empresa. E kompania ta presentá na e Konseho di Mucha un problema stratégiko pa despues nan investigá esaki profundamente i duna nan konseho.

Awa usá

Komo promé paso den e direkshon ei e alumno i guiadónan di Sint Paulus College den kuadro di e tema ‘turismo’ a haña e oportunidat pa tira un bista na e hotèl na Santa Barbara. Por ehèmpel, nan a haña un rekorido na e kancha di gòlf Old Quarry ku un splikashon di kon nan ta tene e yerba bunita bèrdè, entre otro ku awa usá di e hotèl. Ademas, e hefenan di e diferente sekshonnan di e hotèl a splika kiko nan tarea i responsabilidatnan ta, tur ku e mesun meta prinsipal, esta pa sirbi e wéspetnan mihó posibel. E trabou duru di mainta a sigui ku un tayer di almuerso “pa nan mes traha nan hamburger òf hòdòk”. Tra’i mèrdia nan por a fingi di ta turista na Barbara Beach kaminda nan a landa i pasa prèt. Di e ekskurshon aki no únikamente e hóbennan a siña hopi, pero nan a disfrutá tambe i manera nan bisa a bisa, e tabata un dia ku nan lo lubidá nunka mas.

Problemanan

Ku e dia aki a duna inisio na e investigashon di e Konseho di Mucha na e sektor di turismo di Kòrsou, kaminda ta presentá problemanan ku realmente ta biba den komunidat dilanti hóbennan lokal. Eksperensia ta siña ku hóbennan ta bini ku idea kreativo i solushonnan práktiko, loke lo benefisiá turismo.