Willemstad- Dia 21 di yanüari a keda proklamá komo “Dia di Alumno”. E fecha aki ta dia di nasementu di Endrew Isabella, un alumno ehemplar ku semper a sa di destaká den tur lokual ku ela hasi. Endrew tabata un hóben ku apesar di su malesa króniko, semper a mantené perseveransha, positivismo i determinashon. Lamentablemente Endrew a pèrde e bataya kontra su malesa, pero su leyenda ta keda bibu. Pa e motibu aki, nos ta keda konmemor’é di un forma speshal. Tur mucha ku di un of otro forma a sobresalí den enseñansa durante e aña eskolar, ta wòrdu pone den spòtlight pa asina risibí e atenshon i elogio ku nan meresé.

Den kuadro di esaki, Minister M. Alcalá-Wallé a invitá tur alumno di skolnan supsidiá dor di Gobièrnu i ku a destaká pa akudí na Fort Amsterdam riba djaluna 22 di yanüari último, pa duna kada un alumno su rekonosementu i pen di bandera di Kòrsou. E selekshon a kana pa medio di e direktiva di skolnan. Kada skol, a duna nòmber di e alumno ku segun nan meresé rekonosementu. E merdia di rekonosementu tabata emoshonante kaminda e muchanan, dosentenan, mayornnan i mama di Endrew a bini huntu pa konta nan testimonio i kompartí ku otro.

Na final di e enkuentro aki, Minister President sr. E. Rhuggenaath a hiba un palabra di enkurashamentu pa e alumnonan i nan tabata tin e oportunidat pa saka potrèt huntu ku Minister E. Rhuggenaath i Minister M. Alcalá-Wallè riba plenchi di Fòrti. Por mira e grabashon di e merdia aki riba Facebook pagina di Minister van Onderwijs, Wetenschap, Cultuur & Sport.