Minister Hooyboer-Winklaar ta anuncia

ORANJESTAD, Aruba –29 di October 2015: Diaranson dia 4 di november proximo Ministerio di Enseñansa conhuntamente cu representantenan di Seneca College lo tene un anochi di informacion pa tur studiante cu tin e interes pa studia na Seneca College na Toronto, Canada. E anochi di informacion lo tuma luga na e Auditorium di EPI y lo cuminsa pa 7:00 or di anochi.

Durante di e anochi di informacion lo duna informacion general riba studia na Canada y lo enfoca riba e diferente programanan di estudio cu Seneca College tin pa ofrece. E anochi aki lo conta cu presencia di sr. Jos Nolle, kende ta e Dean di Seneca International cu lo por contesta tur pregunta riba e parti di admission, programanan di estudio y tambe facilidadnan cu Seneca College ta ofrece. Banda di esaki lo duna informacion di e posibilidadnan di financiamento di estudio (Arubalening) pa por studia na Canada. Tambe lo tene un live skype session cu e embahada di Canada na Caracas y Mexico City unda cu nan lo duna splicacion amplio riba e proceso di visa pa por studia na Canada.

Manera a wordo anuncia durante e ultimo aña Minister Michelle Hooyboer-Winklaar, na nomber di gobierno di Aruba, a logra formalisa diferente acuerdo na Merca y Canada cu ta garantisa areglonan special na beneficio di nos studiantenan di Aruba. Den e caso di Canada y Seneca College e areglo aki ta encera un descuento substancial di 30% di descuento pa tur studiante di Aruba ariba gastonan di estudio y esaki ta aplicabel pa e mas cu 290 programanan di estudio cu Seneca College ta ofrece. E areglo particular aki cu Seneca College ta un beneficio hopi grandi pa nos studiantenan y ta haci Canada un opcion mas accesibel y atractivo pa studiantenan di Aruba.

Tur studiante cu ta interesa pa bai studia na Canada ta keda cordialmente invita pa e anochi di informacion. Durante di e anochi di informacion lo duna tur e informacion relevante cu studiantenan tin mester pa por bai studia na Canada y specificamente na Seneca College y tambe lo tin espacio pa pregunta. E anochi di informacion lo tuma luga diaranson dia 4 di november cuminsando pa 7:00or di anochi na e Auditorium di EPI.