Lo regalá 10,000 florin na premio kada 2 luna

WILLEMSTAD: Ora nos pensa riba Antillean Soap Company, mesora nos ta pensa riba un kompania ku raisnan fuerte ankrá den suela di Kòrsou. Awendia Antillean Soap Company ta empleá aproksimadamente 80 persona; nos tur sá ku den e tempu di awó, esaki ta un logro grandi. Despues ku a kita protekshon di merkado den añanan 2000, Antillean Soap Company ta un di e poko industrianan lokal ku a keda eksistí. Fábrikanan grandi manera Amstel Brouwerij, Continental Milling, Alimentos Antillianos i algun otro mas tur a sera nan porta. E kurashi pa mantené portanan di Antillean Soap Company habrí, no a bai sin su sakrifisio. Di akuerdo ku Sr. Bert Brugman i Sra. Campara Wauben enkargá ku merkadeo,” No ta fásil tene kabes riba awa den un merkado chikitu manera Kòrsou, miéntras importashon ta tumando lugá for di den tur skina di mundu manera e.o China, Philiphina, Europa, Suramérika i otronan, tòg Antillean Soap Company ta reagrupando i ta preparando pa un periodo di renovashon tékniko, miéntras ta fortifiká e merkadeo supstansialmente”. Próksimamente Antillean Soap Company lo lansa un kampaña ku lo ta plataforma pa un re-introdukshon den merkado lokal despues di tantísimo aña ku ya kaba tur hende a bin ta kustumbrá ku nan produktonan di limpiesa. Un kompania ku a pasa pa diferente generashon, meskos e kustumber i e uso di produktonan manera Disiclin, Tempo, Tender, Vex, Manal, Glorall i Fresca. Tur e produktonan aki i muchu mas ta keda fabriká na Kòrsou i ta resultado di dedikashon, disiplina i responsabilidat di e yu’i Kòrsou empleá na Antillean Soap Company ku tur dia di nobo ta presentá na su boka di trabou pa kumpli ku su responsabilidatnan laboral. Ademas di e fábrika di habon, Antillean Soap Company tin un otro fábrika na unda ku e bòternan ku ta wòrdu usá pa emboteyá e produktonan ta keda fabriká. E fábrika di habon ta konsistí di 5 departamentu, kada unu ta funshoná riba nan kurpa. Asina por hasi menshon di, Fabrikashon di detergente na puiru, Fabrikashon di habon dushi i doméstiko, Produkshon Kloro, Produkshon di detergente i desinfektante na líkido i Fabrikashon di produktonan industrial. Sin konta produktonan industrial i produkto ku etikèt privá, Antillean Soap Company tin 15 marka di produkto, kada grupo ku su mes marka i fabriká na diferente tamaño. Esaki ta forma un total di riba 100 artíkulo den rèki di kualkier supermerkado òf toko na Kòrsou. Komo re-introdukshon den merkado lokal, Antillean Soap Company lo lansa e kampaña ‘Kumpra, Laba i Gana’ na unda ku próksimamente pueblo di Kòrsou lo tin oportunidat di gana Naf. 10,000 kada dos luna. “Nos ta sinti nos mes mashá orguyoso di por tei ketu bai formando parti di e mundu empresarial na Kòrsou. Awòki ta e momentu pa nos duna bèk na tur ku durante di años a bin ta usa nos produktonan, no únikamente pa e kalidat ku ta keda ofresé sino tambe pa motibu ku nan sá ku e produkto ta netamente di nos”, asina Sra. Wauben a sigui komentá. E kampaña ‘Kumpra, Laba i Gana’ lo bai na vigor djamars dia 1 di Aprel próksimo. Tur produkto i tur tamaño di kada produkto respektivamente ta partisipá. Kada 2 luna lo regalá Naf. 10 000,– na premio efektivo. For di awòki ta invitá tur ama di kas i fiel fanatikonan di e produktonan tradishonal i di bon kalidat fabriká na kas, aki na Kòrsou pa keda pendiente pa gana hopi premio. Pa mas informashon tokante produkto, promoshon i e kampaña ‘Kumpra, Laba i Gana’ por bishitá e página facebook/AntilleanSoapCo.