Karnaval 2017 lo ranka sali ku un tremendo ‘Djùmp up / Djùmp in’ ku lo ta un fundraising pa gruponan  miembro di e Asosiashon di Grupo di Karnaval di Kòrsou, AGKK.

E aktividat lo tuma lugá dia 7 di yanüari 2017, pa 7or di anochi, saliendo for di Plasa Hariri pa Stadion di Ref, huntu ku Dreams, Era i DJ Argenis Huerta. Na Stadion di Ref lo sigui djùmp te 2or di mardugá huntu ku Gentz, Era i DJ Argenis Huerta. Den stadion lo tin bar i kushina  bon surtí.

Karchi ta kosta 35 florin, di kual 25 florin ta pa e grupo i ta entregá solamente 10 florin na AGKK pa kubri gastu. E preis ta inkluí un t-shirt i karchi ta solamente optenibel serka gruponan di Karnaval,        miembro di AGKK. Mas karchi e grupo bende, mas entrada pa nan mes.

E fundraising aki pues lo generá fondo èkstra pa e gruponan, miéntras ku di otro banda NO tin gastu envolví pa nan.

AGKK ta invitá bo pa sostené nos gruponan i alabes Karnaval 2017, kumprando karchi pa e Djùmp up/ djùmp in, ku lo ta dia 7 di yanüari próksimo.

Pa kualke informashon adishonal, por yama AGKK na  telefon 462-1790.