Na promé lugá direktiva di Fundashon Karnaval di Banda Bou ta deseá pueblo di Kòrsou tur kos bon den e aña binidero 2016. Aña 2016 ta selebrashon di  47 aña Karnaval di Banda Bou.  Karnaval di Banda Bou ta den full desaroyo, rumbo pa selebrashon 50 aña Karnaval di Banda Bou. E lema di Karnaval di Banda Bou 2016 ta: Karnaval di Banda Bou 2016.. Ku mira pa bria manera un Diamante..

Karnaval di Banda Bou 2016 lo ser dediká na Sra. Minerva Martina. E persona aki, un  karnavalista di pura sepa, tin un trayekto di mas ku 36 aña di dedikashon na Karnaval di Banda Bou. Semper Sra.Minerva boluntariamente a juda tur hende ku bati na su porta ku hopi amor i kariño.

Djadumingu 3 di yanüari 2016 ta selebrashon di Apertura di Karnaval di Banda Bou 2016 na Playa St. Cruz. Ambiente ta kuminsá  3or di atardi ku e apertura ofisial di e Karnaval di Banda Bou 2016 sigui pa e elekshon premio “Dushi Bario”.

Elekshon Premio Dushi Bario ta un konsepto nobo ku Fundashon Karnaval Banda Bou a bin kun’e den 2015. Partisipantenan pa elekshon di reina, prens & pancho di Karnaval di Banda Bou mester duna un presentashon durante kual e partisipantenan ta propaganda e bario di Banda Bou ku e a ser asigná. E meta di e elekshon aki ta pa e partisipantenan sera konosí mas di aserka ku e pueblo i kultura di Banda Bou via di e bario ku el lo tin ku trese den ‘spotlight’ durante e elekshon aki.

Animashon musikal lo ta na enkargo di e banda musikal Gio Fuertisimo, grupo di tambú Ruta i dj.Bradley. Lo tin un bar bon surti i tambe stènt di kuminda.

Na nòmber di henter e pueblo di Banda Bou, nos ke gradisí tur spònsernan di Karnaval di Banda Bou pa e aporte duna na Karnaval di Banda Bou pa asina yuda engrandesé e Karnaval di Banda Bou.

Bin disfrutá dia 3 di yanüari di e dushi ambiente na Apertura di Karnaval di Banda Bou na Playa Sta Cruz.