Willemstad- E kódigo di Good Corporate Governance ta indiká ku promé ku 31 di mei, kompanianan di Gobièrnu mester entregá sifranan i relato anual di e aña anterior. Den kumplimentu ku e kódigo aki, Curoil a entregá 13 di mei último su sifranan ouditá i relato anual di 2015 na akshonista. Esaki tambe a bai pa Kontrolaria General (ARC), Akountant di Gobièrnu (SOAB) i Kolegio di supervishon finansiero (CFT). E relato anual ta inkluí entre otro un relato di gerensia, un relato di hunta di komisario, análisis di kada merkado i produkto, kuentanan anual ouditá. E relato anual ta inkluí tambe e deklarashon positivo di Curoil su bufete di Akountent eksterno KPMG riba tantu e kuentanan anual komo kumplimentu na e kódigo di Good Corporate Governance.
Den e relato anual di 2015, Curoil ta ilustrá ku na aña 2015, grupo di kompanianan di Curoil (Curaçao Oil (Curoil) N.V., Curaçao Gas (Curgas) N.V., Curoil Gasstation N.V., Curoil (Bonaire) N.V. i Curoil (Aruba) Freezone N.V.) den su totalidat a hasi un ganashi di Naf. 49.2 mion. Un di e motibunan prinsipal pa e resultado positivo ta mará na e esfuerso grandi riba merkado internashonal speshalmente e área di negoshi di bunkering ku a faboresé e kompania den 2015 na un manera eksepshonal. Apesar di bahada supstansial di preis mundialmente, kambio den regulashonnan ambiental (ECA) i esfuersonan di benta riba merkado internashonal, a kontribuí konsiderablemente den subida di e margen di ganashi di low sulphur diesel (LSD) den e área di bunkering. LSD ta wòrdu importá for di merkado internashonal dor di Curoil.
Aña 2015 a representá un aña finansieramente positivo pa Curoil i esaki a keda demostrá den Curoil su kontribushon ku aproksimadamente Naf. 101 mion na kaha di Gobièrnu i komunidat. Esaki apesar di bahada supstansial di preis di benta.
Ta di balor agregá pa enfatisá e aporte di Curoil na kaha di Gobièrnu den forma konsiderabel pagando Naf. 27 mion na OB, Naf. 48 mion na akseins i Naf. 15 mion na dividendo. Tambe Curoil a aportá den 2015 ku Naf. 11 mion na impuesto di ganashi.
Den aña 2015 Curoil a selebrá 30 aña di eksistensia i netamente dor di esaki por a mira kon kontinuamente Curoil na diferente okashon a demostrá ku kontribushon finansiero den e komunidatnan kaminda Curoil ta operá ta di sumo importansia.
Den aña 2015 Curoil a kontribuí na donashon, pero prinsipalmente na diferente proyekto pa komunidat pa un total di aproksimadamente Naf. 1.5 mion. Curoil su aporte den e komunidatnan kaminda e ta operá un biaha mas ta supstansial i netamente esaki ta demostrá Curoil su responsabilidat sosial korporativo (Corporate Social Responsibility) ku ta ser konsiderá esensial.
Pa 30 aña Curoil a sa di ta un kompania responsabel, kapas, sólido i stabil, ku un vishon fiho riba ampliashon di merkado internashonal. Curoil ta sigui traha pa keda un kompania finansieramente saludabel ku ta garantisá kumplimentu di su obligashonnan i ku por sigui duna servisio na komunidat.
Ku otro palabra, un ganashi di Naf. 49.2 mion, ta duna Curoil e oportunidat di por sigui aportá di forma supstansial na kaha di Gobièrnu, hasi invershon pa kontinuidat i kresementu riba merkado internashonal i sigui kontribuí di forma konsiderabel na e komunidatnan kaminda Curoil ta operá. Gerensia di Curoil ta gradesido na su empleadonan i tambe klientela lokal i internashonal pa e konfiansa brindá.