Un parke akuátiko nobo na Mambo Beach

Disfrutá di un dia kantu di awa na Mambo Beach awor lo sòru pa un otro tipo eksperensia. For di 21 di novèmber último tin un parke akuátiko ku sigur lo pèrkurá pa momentunan di hopi goso. Empresario Erik Hazelzet ta introdusí AquaSplash na Kòrsou. Pa e último añanan, AquaSplash ta wòrdu harmá den awanan muchu mas friu, na Hulanda. “No tin nada mas bunita ku mira AquaSplash wòrdu realisá aki na Kòrsou. E solo, bientu i e temperatura ku Kòrsou tin ta ideal pa un parke akuátiko manera AquaSplash. Nos ke ofresé muchanan di Kòrsou un eksperensia kantu di awa inolvidabel”, esaki di akuerdo ku e propietario di AquaSplash.

AquaSplash ta un parke di dibertishon akuátiko pa mucha for di 8 aña- adultonan te ku 88 aña tambe por relahá. Si e yu no tin su diploma di natashon, e por hunga den e parke- pero mester tin un adulto presente i e lo mester tin un vèst bistí. Seguridat di e mucha ta na promé lugar, ta pesei mes e parke tin su propio personal ku ta kualifiká i spesialmente entrená pa traha. E parke ta konsistí di diferente parti aventurero. Asina por menshoná e Aquatrack, e Swing, e Rocker, e Spinner, e Bouncer i finalmente e Iceberg.

E parke ta habrí tur dia for di 9’or di mainta pa 6’or di atardi. Dibertí un ora largu pa únikamente 15 florin òf $10. Pa tur bishitante lokal tin un preis spesial di 12 florin. Tin paketenan optenibel spesialmente pa tur mayor ku ta deseá di hasi fiestanan di kumpleaño pa nan yunan na e parke. E fin di siman aki ta ideal pa un bishita na AquaSplash!