Ku hopi satisfakshon instituto di arte Ara Pacis ta presentá e eksposishon di “Mirá for di otro Bista” di nos artista lokal Miurica Cabrera. E eksposishon ta di 5 di novèmber te ku 19 di novèmber próksimo i ta keda tené den e sala di eksposishon di Ara Pacis situá na Lindberghweg 39 den Saliña. Apertura ofishal di e eksposishon lo ta riba 5 di novèmber 2015 pa 7.30’or (mitar di ocho) di anochi. Tur amante di arte ta bon biní.

Ken ta Miurica Cabrera

Miurica ta un persona Outista i un talento lokal ku a kuminsá na un edat hopi yòn eksperimentá su interes den arte. Ya for di 5 aña di edat e a sigui diferente kurso na Skol di Arte di Kòrsou. Ku su 15 aña Miurica a bai Hulanda kaminda e a será konosí mas di aserka ku e diferente téknikanan i na aña 2004 dia e a bin bèk Kòrsou e a kuminsá tuma lès serka e konosido artista Ashley Mauricia. Despues di a konkluí diferente fase serka Ashley Mauricia, e a sigui ku kursonan spesialisá riba téknika di pinta riba glas serka señora Myriam Monasterios di Ara Apacis. Durante su periodo serka señora Monasterios e a haña mas eksperensia den e téknika di uso di kolo ku sombra i alabes kon presentá e diferente degradashon di kolo riba obranan di glas. Konsiderando e bon resultadonan di Miurica, ku satisfakshon e instituto di arte Ara Pacis ta habri e eksposishon aki di Miurica pa laga komunidat sera konosí ku e diferente obranan ku nos artista lokal Miurica a prepará. Tur hende ta bon biní na e eksposishon aki. Pa mas informashon tokante e eksposishon i di e artista Miurica Cabrera por tuma kontakto ku señora Myriam Monasterios na telefòn 569-0045.