Entrega oficial di e proyecto di mehoracion di nos beach

Diahuebs mainta a tuma luga entrega oficial di e proyecto na e beach di Arashi. Esaki ta un proyecto den cuadro di mehoracion di Producto Aruba cu enfoke riba mehoracion di nos beachnan. Arashi awor ta ta conta cu un facilidad nobo cu lo por brinda servicio na e usuarionan di beach cu baño publico, douche y te hasta un kiosco cu ta bay ofrece e oportunidad pa cumpra bebida y cuminda. A percura tambe pa un capa nobo di santo blanco riba henter e beach. E proyecto a inclui tambe un espacio pa warda e stoelnan cu actualmente ta ubica riba e santo bunita di Arashi. Un aspecto unico ta e rampa pa facilita e personanan cu limitacion fisico. Awor nan por yega mas cerca pa disfruta di nos dushi lama. E rampa ta yega na un palapa pa complementa nan experiencia di e Arashi nobo. Un inversion di casi 700 mil florin financia pa e fondo di TPEF.  Minister Otmar Oduber tabata tin palabra di gratitud na e contratista cu tabata encarga cu e proyecto cual a haci un tremendo trabou y DOW cu tambe ta envolvi cu varios proyecto pa mehoracion di Producto Aruba.

“Awor Aruba ta gosa di un Arashi cu un imagen mas organisa” e mandatario ta comenta y ta sigui bisa: “Nos kier evita beachnan cu yen di stoelnan banda di otro cu parasolnan. Nos ta percura pa beachnan di un calidad hopi halto.” E meta principal ta pa baha e presion di e turistanan crucero cu ta haci uzo di e beachnan na Palm Beach pa motibo di e facilidadnan, haciendo uzo di e areanan dilanti e hotelnan asina congestiona creando situacionnan desagradabel. Den e proyecto aki a percura un cantidad di palapa adicional pa cumpli cu e demanda di e cantidad di usuarionan y turistanan di nos barconan crucero.

Sr. Oduber ta comenta: “Awe ta entrega oficial di Arashi y dentro di poco nos lo ricibi tambe e proyecto di Nikki Beach cu tambe ta bin cu su kiosco, facilidadnan, mehoracion di e calidad di awa di lama y espacio di parkeo. Un otro proyecto grandi den mehoracion di calidad. Asina cu esaki tuma luga nos ta sigui cu e proyecto na e beach ubica na Zeewijk.” E prome proyecto tabata esun na Baby Beach cu tambe a conoce cambionan drastico. Kier mehora e calidad di Eagle Beach tambe. “E anja aki ainda kier inicia cu e prome 2 kiosconan di 5 den total riba henter e area di Eagle Beach pa por brinda servicio. Kier acelera e proceso pa por cumpli cu e demanda di e cantidad grandi di bishitantenan cu nos ta spera di barconan crucero pa aña 2016.”

Di e forma aki ta percura cu tin facilidadnan disponibel pa usuarionan, brindando diferente beach como opcion, evitando e congestion den e area di hotelnan. E a crea e oportunidad pa e tour busnan pa bin cu nan clientenan y reparti nan na e diferente beachnan unda lo tin baño disponibel cu nan lo por fresca prome cu subi nan barco bek di crucero. Aruba awor por ta orguyoso di e cantidad di opcion di beachnan, cu un calidad hopi halto y cu facilidadnan unico pa su usuarionan.