ORANJESTAD – Aruba su representante hubenil Srta. Chysah Verstappen, Miss Teen Aruba International 2013 a participa den un siman largo di actividad intensivo na El Salvador den e certamen Miss Teen Americas 2014. E siman a culmina den un sala yen di invitado internacional y un cuerpo di hurado hopi estricto cu a huzga e 12 candidatanan cu a forma parti di e certamen internacional aki. For di e prome salida den trahe nacional disenja pa Renny Lacle y cu pluma extra di Edwin Barry, nos representante a mustra tur hende cu su meta tabata pa conkista e titulo maximo. Sigui pa presentacion den trahe cocktail corra disenja pa Endy Croes, Chysah a hiba un combersacion riba escenario den Spanjo, idioma cu Chysah no ta domina, pero tabata determina pa mustra cu e lo purba laga tur hende compronde loke e kier bisa, sin mester a haci uso di un traductor. Den e di 3 salida Chysah a modela un bikini uniforma y a mustra cu e tin bon dominio di pasarela. Pa culmina a sera e anochi cu presentacion den trahe di gala. Aki nos representante a bisti un shimis di gala disenja pa Sergio Winterdal. Despues di e presentacion den trahe di gala a anuncia e Top 6 semifinalistanan cu a bira paisnan Colombia, Nicaragua, Brazil, Aruba, Panama y Ecuador, sigui despues pa e resultado oficial. Aki ta unda cu Brazil a keda nombra como Princesa (2nd Runner-up), Ecuador como Virreina (1st Runner-up) y Aruba como a triunfadora di e anochi. Mester menciona cu durante full e siman Chysah a wordo makiya y penja door di Endy Croes di N-Designz y tambe a wordo companja pa George Winterdaal di GLW Foundation hunto cu mayornan di Chysah, Eric y Maritza Verstappen.
Sigur un momento hopi bunita cu a laga Aruba orguyoso di su hobennan cu ta resalta tur caminda! Pabien!