Y entrada pa mira Xander Bogaerts hunga Durante di “All Star Game 2016” 

ORANJESTAD, Aruba – 21 di juli 2016: E “X-man” di Aruba, esta Xander Bogaerts a marca historia na momento cu el a subi e “diamond”  di All Star Game 2016 siman pasa. Aruba Airlines cu hopi orguyo a forma parti di e evento comunitario y a celebra e participacion den e All Star Game dor di rifa dos pasashi ida y buelta pa Miami y entrada pa e ganado y su invitado pa bay admira Xander hunga.

Josefa Nicasia Willems a gana e tremendo regalo aki y lo ta biahando pa Miami for di dia 22 pa 27 di september proximo. E ganado a keda hopi contento cu su regalo. “Prepara bo maletanan Josefa, Aruba Airlines ta contento pa tin bo como nos huesped VIP,” asina e representante di Aruba Airlines a duna di conoce na momento di entrega e premio na e feliz ganado.

Fanaticonan di baseball y Xander a gosa di un tremendo evento na Carnival Village, unda cu a disfruta di e wega riba un pantaya gigante. ABBA a duna realse na e atardi cu un Streetball Tournament pa 300 mucha, kende a pasa un rato dushi prome cu e wega All Star a cuminsa.

A funda Aruba Airlines dia 31 di januari 2006 y a realisa su prome vuelo dia 31 di mei 2013. E compania Arubiano tin su oficina principal situa na Cumana 69 aki na Aruba. Aruba Airlines ta bula cu avionnan nobo y moderno, Airbus A 320-200 cu un capacidad di 150 pasahero, parti den 12 pasahero Business Class y 138 den Economy Class. Nan tin un total di 300 empleado staciona na tur nan oficinanan den tur nan mercadonan. Na Aruba so tin 139 empleado den servicio directo.