ORANJESTAD, Aruba – 22 di Mei 2017: Colegio Santa Teresita ta recaudando fondo pa por cumpra airco pa nan biblioteca pa sigui stimula muchanan pa lesa buki den un ambiente placentero. Aruba Bank a haci un donacion na e scol pa nan por logra nan meta di cumpra airco pa e biblioteca.

Colegio Santa Teresita ta un scol basico na San Nicolas y tin 210 studiante parti den 10 klas. E muchanan gusta lesa y hopi di e muchanan no tin e oportunidad pa lesa na cas. P’esey ta importante cu na scol e muchanan por lesa hopi. Pa algun tempo e muchanan no por a haci uzo di e biblioteca.

Aruba Bank ta contento di por a yuda Colegio Santa Teresita cu nan meta di recauda fondo pa cumpra e airco pe biblioteca.