Liderazgo solido ta entre e balornan cu Aruba Bank ta promove

ORANJESTAD, Aruba – 22 di mei 2016: Aruba Bank ta masha contento y orguyoso di ta un di e sponsornan di e congreso titula “Transforming Teachers for the XXI Century”, transformando docentenan pa Siglo 21 y “Uplifting Leadership”, esta  transformando liderazgo.

“Liderazgo solido ta entre otro balornan cu Aruba Bank ta promove pa por sirbi nos comunidad y entrega un balor superior na su clientenan. Ta den e cuadro aki Aruba Bank a scoge pa sostene Directorado di Instituto Pedagogico Arubano (IPA) y ta un honor pa nos pa participa na e congreso Transforming Teachers for the XXI Century y Uplifting Leadership, cu lo promove e balornan di liderazgo entre educadonan.

E celebracion di e di 25 aña di IPA a cuminsa riba dia 18 di mei cu un evento publico na IPA . Riba dia 19 di mei a tuma lugar e evento pa stakeholders “Uplifting Leadership” na Hilton Resort y riba dia 20 di mei a tuma luga e evento special pa docentenan “Transforming Teachers for the XXI Century”.

Organisadonan a conta cu Prof. dr. Andy Hargreaves como e orador principal y a inclui otro sesionnan cu topiconan interesante manera “tecnologia y educacion” y “energia y educacion” den e programa.

Tambe a tuma lugar sesion cu docentenan cu ta traha na IPA y otro expertonan, como tambe un exposicion cu ta refleha diferente faceta importante di e profesion di docente.

Aruba Bank ta felicita IPA cu su di 25 aniversario y alabes e organisadonan y participantenan cu e congreso di nivel halto y sumamente interesante cu tabata un exito rotundo.