Den un esfuerso pa resalta San Nicolas como e centro di nos herencia cultural, Ministerio di Cultura a tuma e iniciativa lansa un proyecto yama Aruba Mural Proyects cu e vision pa promove arte y cultura den nos comunidad. AMP ta arte publico cu e intencion pa amplia accesibilidad di arte y cultura na henter nos comunidad y bishitantenan. Aruba Mural Proyects a ricibi colaboracion di Departamento di Cultura y sosten financiero di UNOCA y AAA. Diahuebs anochi den un ambiente unico a devela e prome 5 murayanan di e proyecto di AMP. Obranan crea pa 4 diferente artistanan local. Artistanan manera Glenda Heyliger, Nigel Matthew Armando Goedgedrag y Rudyomar Leysner. Un fusion di diferente generacion trahando hunto y traspasa experiencia y talento pa nos futuro generacion. Ya caba hopi ta esnan cu ta sacando potret na e murayanan aki y compartiendo esaki riba rednan social. Ta sumamente interesante pa tende e inspiracion tras di cada un di e murayanan aki. Por ehempel esun di Armando Goedgedrag cu ta comparti cu nos cu e concepto ta basa riba e filosofia di San Nicolas como e Sunrise City. Sr. Goedgedrag a keda inspira pa algun icono monumental den e districto manera Charlies Bar, Watertoren, Misa Santa Teresita y tambe e Anker na Seroe Colorado. Armando su obra sigur a haya hopi atencion.

Rudyomar Leysner cu ta un di e artistanan hoben a keda inspira pa naturalesa. E la basa su arte riba e mata yama Brasil cual Aruba tabata exporta. Den su obra e la purba di trece un conexion di pasado cu presente promedio di un camara polaroid, sacando potret di monumentonan. Cada un muraya cu su storia. Henter comunidad ta keda cordialmente invita pa pasa y aprecia e bunita obranan aki treciendo asina arte mas cerca di cada un di nos. Esaki ta e prome fase y por spera mucho mas di Aruba Mural Proyects!