Kòrsou, 27 di febrüari 2016 – Asosiashon di Guia PNA (AGPNA), e organisashon di patfenderei pa mucha muhé na Kòrsou, e aña akí orguyosamente ta anfitrion di e konferensia regional di patfenderei den Hemisferio Oksidental, kaminda 35 pais di Region i Karibe lo partisipá.

E konferensia lo tuma lugá di 18 pa 22 di yüli próksimo na Hilton Curaçao Resort i ta konta ku 150 partisipante prosedente di Nort Amerika, Amerika Sentral, Sur Amerika i Karibe.

Meta

Meta di e konferensia ta e.o. pa promové i ekspandé patfenderei pa mucha muhé den region. Partisipantenan lo deliberá riba temanan relashoná ku desaroyo general i kalidat di patfenderei den region di Hemisferio Oksidental (Western Hemisphere). Tambe lo deliberá riba e plan regional pa loke ta trata kresementu di miembresia. Alabes lo papia tokante lansamentu di inisiativanan nobo manera programanan i partnershipnan global. Lo tin ademas elekshon pa skohe miembronan nobo pa forma parti di direktiva di e region di Western Hemisphere.

Durante e konferensia lo tin oportunidat pa sigui training i workshop tambe. Esakinan ta yuda lidernan den nan preparashon i kresementu personal pa avansá den e trabou ku nan ta hasi na bienestar i formashon di mucha muhé hóben i hende muhé, pa nan por ta personanan kapasitá i útil den komunidat.

Tema

Tema di e konferensia ta: Konektá, krese i impaktá: Uniendo un movementu global. E tema ta reflehá ku ta importante pa traha riba konekshon i relashonnan entre hende rònt mundu, p’asina huntu nos por desaroyá i krese pa kousa un impakto positivo i importante den bida di nos mucha i muhénan hóben i hubentut en general.

Relashon mundial

E region di Hemisferio Oksidental ta un di e 5 regionnan global ku ta forma parti di e organisashon mundial di patfenderei pa mucha muhé, ku ta WAGGGS. WAGGGS ta para pa World Association of Girl Guides & Girl Scouts.

AGPNA ta miembro di WAGGGS for di aña 1978 i aktualmente AGPNA tin e privilegio di tin un miembro, kende ta sra. Meredith Petrona-Martina, ku ta forma parti di e direktiva di region di Hemisferio Oksidental. Sra. Petrona-Martina ta sirbiendo den e direktiva akí pa 3 aña kaba i ta aportando na e movementu di patfenderei riba nivel internashonal.

AGPNA ta trahando duru pa logra un konferensia eksitoso i fruktífero, i lo perkurá pa Kòrsou bria komo pais anfitrion. E partisipantenan lo haña un sabor di nos isla, nos hospitalidat i amabilidat komo bon patfentster i bon yu di Kòrsou!