Willemstad, despues di un trayektoria largu i intenso di grabashon, Driver Studios ta presentá na bosnan e gran estreno di e promé Rap Musical film “ Atenshon”. E primisia di Atenshon lo tuma lugá dia 31 di òktober,8or di anochi na Teatro Luna Bou. Den e pelíkula Atenshon tres hoben ta haña nan den situashonnan difísil durante nan búskeda pa Atenshon. Tibi,un mucha muhé inteligente I fresku, tin tur lokual ta material. Pero mas ku tur kos un karisma ineksplikabel. Unda ku e yega, tur hende ta gusta kuné. E ta hunga su wega I hasi kos pa malu pa e gainan kai p’e. Paso pa e, importante ta e atenshon, kual e no ta haña na kas. Micheal I Kenny ta dos mucha hòmber ku a disidí di sigui ku negoshi di nan tatanan di bendementu di droga despues ku un polis a mata Micheal su tata I enkarselá esun di Kenny. P’esei komo e dos amigunan mas uni di nan bario for di infansia, nan a primintí ku un dia e polis ei lo paga bek loke nan a sufri. I sin a planiá Tibi I Micheal a bin namorá di otro. Tibi tin muchu koinsidensia ku e persona ku a mata Michael su tata I sera su tata. Si ta Tibi su tata resultá e polis ei. Ki tei pasa awó? E plan lo sigui? Òf e plan lo terminá? Atenshon ta primintí di bai tene e públiko den un suspenso total. E pelíkula aki ta bai ta kompletamente musikal ku e género rap komo interpretashon di e teksto. Tin ku duna di konosé ku nos hóbennan lokal a traha e pelíkula aki. Atenshon a ser skibi pa e hoben Terence Alberto i dirigí pa e hoben Stephan Lacroes. E produktornan ta Terence Alberto i Spitz Beatz. Durante e primisia di Atenshon dia 31 òktober Teatro Luna Blou lo keda kombertí na estilo Hollywood kaminda tur nos artistanan lo baha for di limousine i kana riba Red Carpet bai paden. E siguiente funshon nan lo tuma lugá dia 1 i 2 di novèmber 6or di atardi i 9or di anochi. Atenshon a ser hasi posibel danki na Teatro Luna Blou , Fatum, RBC, Korpodeko, Driver Studios i Sirius. Pueblo di Kòrsou ta keda invitá pa bin presensia e prome musical rap film di Kòrsou. Karchi ta kosta solamente 13,50 i ta optenibel na takia di Teatro Luna Blou, Time to Time i Pompstation Sta. Maria. Miembronan di Luna Blou ta haña tarifa redusí. Pa mas informashon tokante Atenshon bishita facebook page di Atenshon, Teatro Luna Blou su página web : www.lunablou.com òf nos facebook page: Teatro Luna Blou. Tambe por yama Teatro Luna Blou na 462-2209.