Sr. Atalita: Mester krea kupo di trabou pa hubentut i yuda skapa Kòrsou!
WILLEMSTAD – Pa Giovanni Atalita, Presidente di Hunta di Komisario , lantamentu di AVA Airways Curaçao ta netamente un di e katalisadornan pa krea kuponan di trabou prinsipalmente aki na Kòrsou, ku ta bai ta e hub prinsipal di e kompania ku ta konektá paisnan den Sur Amérika ku otro den e trayekto east-west. Dia 30 di desèmber 2013, ofisialmente AVA Airways a hasi su petishon ofisial konforme e Landbesluit di pidimentu di pèrmit ekonómiko. Ya ta bai yegando 18 luna sin ku ainda AVA Airways Curaçao a risibí esaki. Resientemente CBS a informá ku e desempleo bou di hubentut aki na Kòrsou ta kore den kareda di 37% loke ta algu alarmante i bou di pueblo general 13% ku ta skandaloso. Di akuerdo ku e businessplan di AVA Airways, Kòrsou lo bai ta un hub pa pasaheronan for di Sur i Sentro Amérika i tambe Karibe ku mester komuniká ku otro, un ku te na e momentunan aki ningun kompania di aviashon no ta hasiendo. No ta pòrnada ku na ougùstùs di 2014, Air Bus a hasi un route analys di e bussinessplan aki di AVA Airways i a mustra ku e lo ta un kompania ku lo bai gana plaka, mirando ku e lo tin avion nobo, ku ta bula mas ekonómiko. For di e site di Airline Network News and Analysis, por a tuma nota ku ta kompanianan manera Copa di Panamá, American Airlines i United Airlines e dos últimonan aki di Estádos Unídos ta luchando pa mira ken ta number unu den mundu di aviashon i ta dominá e merkado. A resultá ku kompará ku luna di febrüari 2014, na 2015 e tráfiko di persona for di Norte Amérika pa Amérika Central a oumenta ku 7%, loke ta un indikashon, manera Chairman di AVA, Sr. Olivier Arrindell a bisa resientemente sitando for di e forcast di ICAO kuantu avion nos hemisferio mester na aña 2033. For di e Airline Network News and Analysis, por a tuma nota ku e tòp 12 kompanianan di aviashon den nos region ku mas ta transportando pasaheronan ta Copa Airlines ku +14.7%, American Airlines ku +2.6%, United Airlines ku -0.6%, TACA ku +20.8%, Delta Air Lines ku +36.7%, Spirits Airlines ku +5.4%, Aeromexico ku +17.1%, LASCA ku -54.5%, Jet Blue Airways ku +52.7%, US Airways ku -11.6%, InterJet ku -3.6% i Air Transat ku -18.3%. Ku lantamentu di AVA Airways Curaçao, nos intenshon ta pa kompetí ku e tòp 12 kompanianan ku mas ta hasi uso di área di Karibe, Sentro i Sur Amérika. Ta entre e kompanianan aki AVA Airways ta bai kompetí, pasombra e merkado di pasaheronan ta kresiendo. Al kontrario, na momentu ku Kòrsou haña un kompania fuerte nobo, hybrid, ku avionnan nobo, esaki lo ta na benefisio di tur kompania establesé lokalmente, pasombra esaki ta nifiká ku unu lo komplementá otro. Pa Presidente di hunta di direktiva di AVA Airways na Kòrsou, tabata tristu mira na 2013 kon e trahadónan di DAE, pero tambe kon otro empresanan aki na Kòrsou a bin ta sera i míles i míles di nos suidadanonan ta kan as sin trabou. Ta hustamente den esaki AVA ku duna un man kreando trabounan pa piloto, flight atendent, mehikano i personal di tera.
NO TIN SUFISIENTE AIRLIFT
Segun Giovanni Atalita, un dje kosnan ku mas Kòrsou ta yora pe na e momentunan aki ta airlift. Ku tur e kompanianan ku nos tin ta baha aki, hotèlnan ta yorando tur dia ku no tin sufisiente turista pa yena kambernan. Un djies aki Sambil un proyekto tremendo ta habri su portanan. Mester di mas airlift i mas hende pa pisa nos suela. Sr. Atalita a mustra ku na yanüari 2014 el a hasi un biahe ofisial pa AVA Airways pa Haiti, kaminda a hiba kombersashon ku Minister di Turismo di e pais aki. A konstatá ku pa dia for di Estádos Unídos so tin no menos ku 13 buelo ta baha i lanta na Port Au Prince. Aki na Kòrsou nos tin solamente 2 American Airlines i un Insel Air pa dia kombiná ku Jet Blue dos biaha pa siman. Esaki ta djies un dje aspektonan pa mustra ku Kòrsou mester di mas buelo. I konforme e businessplan di AVA Airways, e lo yena un buraku ku ta bai yuda Kòrsou. Por último Presidente di AVA Airways a bisa ku nan ta wardando 18 luna ku pasenshi i ta wardando un kontesta. “Un kos mi sa i esei ta ku dia ku mi a entrega e business plan a bisa mi ku esaki ta un dje mihó businessplannan ku a keda entrega aki na Kòrsou, asina Sr. Atalita a finalisá bisando.