Air Service Development Manager di A.A.A., Jo-Anne Arends Riba diabierna, diasabra, diadomingo y dialuna mainta

ORANJESTAD, Aruba – 24 di April 2017: E aerolinea Avianca tin un relacion cu Aruba di 92 aña, e prome vuelo a yega Aruba na aña 1925. “Ultimo añanan Avianca a mira un demanda grandi di parti Colombia pa Aruba, no solamente den turismo pero tambe di ciudadanonan di nacionalidad Colombiano cu ta bishita nan famia. Pero tambe pa turismo medico Avianca a mira un aumento den e demanda”, asina Jo-Anne Arends, Air Service Development Manager na Aruba Airport Authority N.V. (AAA) a duna di conoce.

Tambe ta bin man den man cu Aruba a elimina visa pa Colombia algun tempo atras y ta mira cu e demanda pa turismo a crece. “Desde siman pasa Avianca a amplia cu 4 vuelo pa siman. Es decir un vuelo parti mainta, nos tin vuelo parti atardi caba, pero a añadi 4 vuelo mas na nan iterinario cu ta bira 11 vuelo pa siman”.

E vuelo nobo ta sali tur diabierna, diasabra, diadomingo y dialuna pa 7:57am for di Bogota y yega Aruba pa 10:53am y sali bek 11:53am y yega Bogota pa 12:44pm. Lo bula entre otro cu avionnan modelo Airbus 319 cu tin mas o menos 120 stoel abordo cu hunto ta percura pa alrededor di 600 stoel adicional for di Bogota pa siman. Esaki lo encera un aumento di capacidad di 37% pa aña 2017.

Cu e adkisicion aki, AAA ta convenci cu lo engrandece e ruta di Avianca cu opcion pa no solamente bay Bogota, pero tambe otro destinacionnan domestico den Colombia manera Cali, Medellin y Pereira. Tambe pa mercadonan existente pa Aruba manera Argentina, Brazil y Chile, pero tambe awor ta brinda oportunidad pa explora mercadonan nobo den Sur America manera Costa Rica, San Salvador y Uruguay.

Aeropuerto ta hopi satisfecho y contento pa mira un crecemento grandi asina aki den capacidad pa Aruba. Esaki ta subraya e partnership entre Aruba Airport Authority N.V., Aruba Tourism Authority y Avianca mes, reuniendo varios biaha den e ultimo añanan aki pa enfatisa y pusha e parti cu mester mas vuelo pasobra AAA ta mira cu stoelnan ta yen y cu un crecemento ta den demanda. Semper a mantene un bon relacion y lo sigui explora oportunidad pa expande Avianca su portofolio.

Pa logra expande rutanan existente of nobo, e tin su caminda pa cana – e ta un proceso extenso – unda mester desaroya un business case solido pa mustra e sostenibilidad di añadi mas vuelo / capacidad y convence dicon Aruba.

Sigur cu AAA tin un relacion hopi fuerte cu Avianca. E ta sigur un partnernan hopi valioso pa Aruba. Semper Aeropuerto ta keda cu Lima, Peru como un hub instrumental pa conecta Aruba cu Sur America riba lista di deseo, cu ta algo sigur cu nan kier sigui explora. Algun luna pasa a kita e visa pa Peru y esaki sin duda lo tin su efectonan den demanda di pasaheronan cu lo kier bin Aruba. Jo-Anne Arends ta kere cu den termino largo, plannan cu tin cu Avianca ta pa habri un hub nobo cu vuelo Lima–Aruba, of otro opcion lo ta pa bay di 11 pa 14 vuelo pa siman for di Bogota. “Esey tambe ta un topico riba mesa”, Jo-Anne Arends a remarca na final.