WILLEMSTAD- 1 di yüli 2014 – Pa di 6 aña konsekutivo Ofisina di Turismo di Kòrsou (CTB) ta honra e mihó graduadonan den sektor di Turismo i Hospitalidat. E award di ‘Dushi Hende’ a keda duna na 12 hóben ku a sobresalí dor di terminá nan aña eskolar ku resultadonan ekstraordinario. Tur a risibí un award di ‘Dushi Hende’ na man di Minister di Desaroyo Ekonómiko, sr. Stanley Palm. Durante di e evento a pone énfasis riba e 6 balornan ku ta forma base di e kampaña  di ‘Dushi Hende’ kualnan ta: Hospitalidat, Servisio, Responsabilidat, Orguyo, Integridat i Honestidat. Ku entrega di e award di ‘Dushi Hende’, CTB ta spera di duna e studiantenan ku a sobresalí un èkstra motivashon pa nan kontinuá hasiendo nan máksimo esfuerso den nan próksimo estudio òf  riba merkado laboral turístiko. Ademas e award aki lo mester sirbi pa motivá e hóbennan ku aworakí ta siguiendo nan estudio den e direkshon di Turismo i Hospitalidat pa próksimo aña eskolar nan por ta esun ku ta risibí e award di ‘Dushi Hende’. Na e okashon aki Minister Palm a dirigí su mes na esnan presente enfokando riba e ròl importante ku rekurso humano tin den desaroyo di nos produkto turístiko. Na final di e parti ofisial e graduadonan i demas invitadonan a disfrutá di un sukulento sena. E aña aki tabatin tambe mesa di informashon di Nilda Pinto SBO, ICUC, CDC, FEFFIK i SSC kaminda e studiantenan, nan mayornan i demas invitadonan por a haña informashon di posibilidat di estudio aki na Kòrsou mes.  E hóbennan ku a risibí e award di ‘Dushi Hende’ ta hóbennan ku a bishitá diferente skol lokal i sigui nan estudio di Turismo i Hospitalidat. Ta trata di: Ginette Monte (CDC),  Signayra Jamanika, Danielli de Cahna i Florette Janga (Nilda Pinto SBO), John-Micheal Alberto (Jacques Ferrandi VSBO), Chris Rosinda (Marnix VSBO),  Ketline Magdalena i Germain Orienta (FEFFIK),   Miangela Semeleer iRainer Pourier (Maris Stella SBO),  Sheekenawonks Lavilette (Maris Stella VSBO) i  Ezverriene B. M. Cijntje (ICUC). Un danki ta bai na mayornan i dosentenan ku a guia e hóbennan aki pa nan por a alkansá nan meta. Pabien!