Entrante 17 di novèmber próksimo e karchi bieu lo wòrdu blòkiá:

WILLEMSTAD:- Klientenan di Banco di Caribe entretantu a risibí nan tarheta di débito nobo ku teknologia ‘chip’. E karchi nobo lo ofresé e kliente aun mas tantu seguridat i komodidat, ademas di esaki ta konta ku un diseño nobo tambe. E tarheta di débito bieu lo wòrdu blòkiá entrante 17 di novèmber próksimo.

Bo no a risibí bo karchi nobo ainda?

Klientenan ku ainda no a risibí nan tarheta di débito nobo lo mester busk’é na Banco di Caribe Saliña. Por akudí na e bali di servisio na kliente; e karchi nobo lo ta klá wardando pa wòrdu rekohé. Tur kliente lo mester trese nan karchi bieu (esun sin e chip) i un identifikashon balido pa por risibí e tarheta di débito nobo. Ta warda tur kliente ku mester buska nan karchi nobo entre 8’or di mainta i 4’or di atardi, di djaluna pa djabièrnè i riba djasabra for di 9’or di mainta pa 1’or di mèrdia.

Aktivá promé ku 17 di novèmber:

Tur kliente ku a risibí nan tarheta di débito nobo pero ku ainda no a hasi e aktivashon, mester hasi esaki promé ku dia 17 di novèmber próksimo dor di hasi un transakshon na un mashin di pago òf na un ATM. Si e kliente a risibí su karchi nobo kaba i tambe a hasi e aktivashon manera indiká, e lo no mester akudí na Banco di Caribe mas.

Uso di e karchi ku ‘chip’:

Awó, e kahera(o) ta hinka e tarheta di débito den e lesadó di e chip na lugar di ‘swipe’ esaki den banda di e mashin di pago. Despues e kahera(o) ta hinka e montante di kompra, e kliente ta konfirmá i ta hinka su kódigo (PIN) pa por finalisá e transakshon. E karchi lo mester keda den e mashin te ora e mashin mes indiká ku por sak’é. Ta invitá tur kliente pa akudí na Banco di Caribe Saliña promé ku dia 17 di novèmber pa buska nan tarheta di débito nobo. Pa mas informashon por bishita www.bancodicaribe.com òf yama 432-3200  pa mas informashon i asina evitá ku e karchi bieu ta wòrdu desaktivá miéntras ku e ta den uso.