WILLEMSTAD – Den kuadro pa sigui yuda konsientisá nos komunidat pa pone mas atenshon na nan kurason, BECEL, TeleCuraçao FM, Lions Club, Universal Motors Kia i Maduro & Curiel’s Bank ta djòin un biaha mas pa huntu organisá e kaminata “Ban Move Awor” i selebrá nos promé lustro.
Aparte ku kanamentu semper ta super bon pa salú, tur loke keda generá pa medio di e kaminata aki ta bai pa un bon kousa. Moises de Marchena & Sons ku ta e kompania representante di e produkto BECEL, un margarina ku ta kontené Omega 3 i 6 ku ta yuda tene bo kurason i arterianan salú, a skohe Curaçao Heart Foundation komo e organisashon ku lo risibí e montante ku keda generá pa medio di e kaminata “Ban Move Awor”. Lions Club tambe lo hasi un donashon na Curaçao Heart Foundation.
E kaminata “Ban Move Awor” ta tuma lugá djadumingu 28 di ougùstùs 2016 i ta start 7:00 am.
E kaminata ta start na Showroom di KIA na Saliña i partisipantenan ta kana un distansia di 7 kilometer. E aña aki nos ta selebrá nos di 5 aña i durant e ruta nos lo tin Dj Jowi di TCFM i tambe e grupo SQUAD ku ta Area 51, Mason, Chaika i Dj.Carlito. Pa tur persona ku ta interesa, T-shirt pa adulto ta NAf. 15,– i NAf.10,– pa mucha. Kada persona lo risibí un T-shirt koló blanku, awa durante e ruta i na final di e kaminata kada persona lo risibí un “Ban Move Awor” goody bag. Promé ku salida, tur partisipante tin oportunidat pa midi nan preshon grátis i manera tur aña nos lo tin un warm up pa 6:30 am ku ta na enkargo di Coach Sabina pa lòs e múskulonan.
Maduro & Curiel’s Bank, É Banko Amigu, pa di sinku aña konsekutivo ta un di e patrosinador nan di e grandioso kaminata “Ban Move Awor”. E kaminata ta unu tremendo ku henter famia por partisipá n’e i kanamentu alabes ta tene nos mente i kurpa den bon kondishon i salú. TeleCuraçao FM ta stimulá tur Yu di Kòrsou pa Ban Move Awor. E Yu di Kòrsou ta konsiente di su salú i ta tene su kurason den bon kondishon usando Becel. Hasiendo ehersisio tambe ta mantené e kurpa i kurason salú.
T-shirt ta optenibel na Showroom di KIA (na Saliña) durante oranan di ofisina i dianan 26 i 27 di ougùstùs na e supermarkadonan Albert Heijn, Centrum Mahaai, Esperamos Supermarket, Mangusa Hypermarket i Vreugdenhil. Like nos Facebook Page “Ban Move Awor” pa bo keda informá di tur informashon i sintonisá bo radio TCFM. Na e supermarketnan tambe lo tin e posibilidat pa midi bo preshon.
Pa loke ta trata e aspekto di seguridat, organisashon di ‘Ban Move Awor’ tin máksimo atenshon pa seguridat di tur partisipante. Kuerpo polisial ta enkargá pa sera e kayanan di e ruta. Un apelashon sinembargo na tur partisipante pa keda riba e ruta stipulá i sigui e reglanan ku e tim di seguridat i polis duna. Si akaso un partisipante kansa lo tin vehíkulonan bon identifiká ku lo baha bo kaminda bo ta deseá riba e ruta. Rode Kruis tambe lo tei pa duna un man manera semper.
BECEL, TeleCuraçao FM, Lions Club, Universal Motors Kia i Maduro & Curiel’s Bank ta invitá un i tur pa Ban Move Awor ku bo famia, djadumingu 28 di ougùstùs i alabes yuda kontribuí ku Curaçao Heart Foundation.